ПэщакIэм нэIуасэ фашIыгъ
Урысыем граждан зыухъумэжьынымкIэ, ошIэ-дэмышIэ IофхэмкIэ иминистрэ игуадзэу Андрей Гурович видеоселектор шIыкIэм тетэу Адыгеим и ЛIышъхьэу КъумпIыл Мурат Урысыем и МЧС АР-мкIэ и ГъэIорышIэпIэ шъхьаIэ ипащэу агъэнэфэгъэ Станислав Илющенкэм тыгъуасэ нэIуасэ фишIыгъ.
Iофтхьабзэм хэлэжьагъэх АР-мкIэ федеральнэ инспектор шъхьаIэу Сергей Дрокиныр, Адыгеим и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, республикэм ипрокурорэу Игорь Шевченкэр, ФСБ-м АР-мкIэ и ГъэIорышIапIэ ипащэу Сергей Каштановыр, Адыгеим хэгъэгу кIоцI IофхэмкIэ иминистрэу Иван Бахиловыр, Росгвардием АР-мкIэ и ГъэIорышIапIэ ипащэу Иван Гричановыр.
Адыгеим и ЛIышъхьэ зэрэхигъэунэфыкIыгъэмкIэ, республикэм ипащэхэм машIом зыкъимыштэнымкIэ, граждан зыухъумэжьынымкIэ, ошIэдэмышIэ тхьамыкIагъохэм ядэгъэзыжьынкIэ къулыкъухэм хэхъоныгъэ ягъэшIыгъэным анаIэ ренэу тырагъэты.
«ЧIыопс, техногеннэ нэшанэ зиIэ тхьамыкIагъохэм республикэр икъоу ащыухъумэгъэным мэхьанэшхо иI. ЦIыфхэм ящыIэныгъэрэ япсауныгъэрэ къэтыухъумэнхэ фае. ОшIэ-дэмышIэ тхьамыкIагъор къэхъун зэрилъэкIыщтымкIэ цIыфхэм макъэ ягъэIугъэным, псыхъохэр къиунхэ, машIом зыкъиштэн зилъэкIыщт лъэхъанхэр зэпычыгъэнхэм мэхьанэшхо яI», — къыIуагъ КъумпIыл Мурат.
Станислав Илющенкэм видеоселекторым хэлэжьагъэхэм цыхьэ къызэрэфашIыгъэмкIэ зэрафэразэр, пшъэрылъэу къыфашIыгъэхэм ягъэцэкIэн ыкIуачIэ зэрэрихьылIэщтыр къыIуагъ.
Республикэм и ЛIышъхьэу КъумпIыл Мурат ГъэIорышIэпIэ шъхьаIэм ипэщакIэ иIофшIэн гъэхъэгъэшхохэр щишIынэу фэлъэIуагъ.
Станислав Илющенкэр 1983-рэ илъэсым Къэбэртэе-Бэлъкъарым икъалэу Налщык къыщыхъугъ. 2003-рэ илъэсым Урысыем и МЧС и Академие, 2010-рэ илъэсым — Кисловодскэ дэт гуманитарнэ-техническэ институтыр, 2013-рэ илъэсым — Урысыем и МЧС и Академие къыухыгъэх. Ростов хэкумкIэ УФ-м и МЧС и Гупчэу цIыфхэм якъэгъэнэжьын фэгъэзагъэм, Къэбэртэе-БэлъкъарымкIэ, Адыгэ РеспубликэмкIэ МЧС-м якъулыкъухэм ахэтыгъ. Урысыем и МЧС АР-мкIэ и ГъэIорышIэпIэ шъхьаIэ ипащэ игодзагъ, 2019-рэ илъэсым къыщегъэжьагъэу зигугъу къэтшIыгъэ ГъэIорышIапIэм ипащэ ипшъэрылъхэр пIалъэ горэкIэ ыгъэцэкIагъэх.