Къалэхэмрэ къуаджэхэмрэ япсэуалъэхэу апэрэ чэзыоу зэтегъэпсыхьэгъэн фаехэр мэ­лылъфэгъум и 26-м къы­щегъэжьагъэу жъо­ныгъуакIэм и 30-м нэс мэкъэтынэу Уры­сыем щыкIощтымкIэ зэрагъэшIэнхэ алъэкIыщт.

Ащ пае федеральнэ платформэу «za.gorodsreda.ru» зыфиIорэр апэрэу къыз­фагъэфедэщт. Партиеу «Единэ Россием» и Генеральнэ совет исекретарэу Андрей Турчак УФ-м и Правительствэ и Тхьаматэ игуадзэу Марат Хус­нуллиным игъо филъэгъугъ а программэм зегъэушъом­бгъугъэнэу, УФ-м иминист­рэхэм я Кабинет игъусэу мы Iофыгъом дэлэжьэнхэу.

«ЦIыфхэм джыдэдэм нахь ашIоIофыр тетIысхьэпIэ дэгъухэр, къэгъагъэхэр, куандэхэр зыдэт, кIэлэ­цIыкIу, спорт джэгупIэхэр зыхэт ящагухэр ары нахь, скверэу, псыхъоIушъоу зэтырагъэпсыхьажьыщтхэм мэхьанэшхо аратырэп. Щагухэм язэтегъэпсыхьан программэм ипычыгъо шъхьаф рагъэубытынэу тыфай. Мыщ дэжьым щагухэмрэ кварталхэмрэ ядэхьапIэхэри гъэкIэжьыгъэнхэм, джырэ шапхъэхэм адиштэрэ технологиехэмрэ псэолъапхъэхэмрэ гъэфе­дэгъэнхэм, къэгъагъэхэмрэ чъыгхэмрэ нахьыбэу къа­лэхэм къащыгъэкIыгъэнхэм мэхьанэшхо яI», — къыщиIуагъ Андрей Турчак УФ-м и Правительствэ итхьаматэ игуадзэ бэмы­шIэу дыриIэгъэ зэIукIэгъум.

«Единэ Россием» и Генеральнэ совет исекретарь игъо ылъэгъугъ псэу­пIэ цIыкIухэм къафыхагъэ­кIырэ мылъкур зы шъо­лъырым телъытагъэу сомэ миллиони 100-м нэгъэсыгъэнэу. Джащ фэдэу зы­хъукIэ, Чукоткэм, Еврей, Ненецкэ автоном койхэм, Къалмыкъым, Камчаткэ, Сахалин, Магадан псэолъэ нахьыбэ ащызэтырагъэ­псыхьан алъэкIыщт.

Джащ фэдэу Андрей Турчак урысые зэнэкъо­къоу «Къэлэ цIыкIухэмрэ тарихъ мэхьанэ зиIэ псэу­пIэхэмрэ адэсхэм ящыIакIэ зыкъезыгъэIэтыщт анахь проект дэгъу» зыфиIорэм хэлэжьэрэ къалэхэми ахэгъэхъогъэн фаеу елъытэ.

«Нэбгырэ мини 100 зы­дэс къалэхэр ары непэ программэм хэлажьэхэрэр. Нэбгырэ мин 200 — 300 зыдэсхэри ащ хэлэжьэнхэмкIэ амалэу щыIэхэм ахэплъэнхэу, къэлэ гъэ­псыкIэ зиIэ поселкэхэри зэнэкъокъум хагъэлэжьэнхэу, бэдзэогъум и 1-м нэс заявкэхэр аIахынхэу игъо тэлъэгъу», — къыIуагъ пар­тием и Генеральнэ со­вет исекретарь.

Ащ фэдэ предложением къызэрэдыригъаштэрэр, УФ-м псэолъэшIынымкIэ ыкIи псэупIэ-коммунальнэ хъызмэтымкIэ и Министерствэрэ партиеу «Единэ Россиемрэ» ахэм ягъэцэ­кIэнкIэ амалэу щыIэхэр зэрагъэшIэнэу пшъэрылъ зэрафишIыщтыр Марат Хуснуллиным къыIуагъ. Ащ зэрэхигъэунэфыкIыгъэмкIэ, федеральнэ проектэу «Къэлэ щыIэкIэ зэтегъэпсыхьагъ» зыфиIорэм диштэу илъэс заулэ­хэм къакIоцI общественнэ чIыпIэ, щагу мин 83-м ехъу зэтырагъэпсыхьагъ.

Шъугу къэтэгъэкIыжьы 2017-рэ илъэсым къыщегъэжьагъэу ыпшъэкIэ зигугъу къэтшIыгъэ федеральнэ проектыр УФ-м и Правительствэ зэрэпхырищырэр. Ащ лъапсэу иIэр партийнэ проектэу «Джырэ шапхъэхэм адиштэрэ къэлэ псэукI» зыфиIорэр ары. Щагухэу, зыгъэпсэфыпIэ чIыпIэхэу зэтыра­гъэпсыхьащтхэм якъыхэ­хынкIэ цIыфхэм яшIоигъоныгъэхэр къыдалъытэх. Мы илъэсым телъытэгъэ феде­ральнэ бюджетыр агъэхьазыр зэхъум программэм мылъкоу къыфыхагъэкIыщтыр сомэ миллиарди 2-кIэ нахьыбэ ашIыгъ. Ащ ишIуа­гъэкIэ 2021-рэ илъэсым зэтырагъэпсыхьажьыщтхэм щагу, общественнэ чIыпIэ 900 джыри къахэхъощт.

Федеральнэ проектэу «Къэлэ щыIэкIэ зэтегъэ­псы­хьагъ» зыфиIорэм Адыге­имкIэ икоординаторэу Джармэкъо Азмэт мы лъэныкъомкIэ цIыфхэм яшIошIхэр къызэрэдалъы­тэрэр къыIотагъ:

— «Единэ Россиер» кIэ­щакIо зэрэфэхъугъэм тетэу 2017-рэ илъэсым къыщегъэжьагъэу федеральнэ проектэу «Псэу­пIэмрэ къэлэ щыIакIэмрэ» зыфиIорэр зэрэхэгъэгоу щыпхыращы. Ащ къыды-хэ­лъытэгъэ программэу «Джырэ шапхъэхэм ади­штэрэ къэлэ псэукI» зыфиIорэр Адыгеим зэрэ­щагъэцакIэрэм АР-м и ЛIышъхьэу, партиеу «Единэ Россием» ишъолъыр къутамэ и Секретарэу Къум­пIыл Мурат ышъхьэкIэ гъу­нэ лъефы. Щагухэри общественнэ чIыпIэхэри джырэ шапхъэхэм адиштэу зэтырагъэпсыхьэх. Пар­тийнэ проектым иобщест­веннэ советэу республи­кэм щызэхэщагъэм цIыф­хэм макъэ арегъэIу чIыпIэхэм язэтегъэпсыхьанкIэ пIалъэхэр къыдалъытэ­хэмэ, дизайн-проектхэм ыкIи нэмыкI шапхъэхэм ахэр адештэхэмэ е адемыштэхэмэ.

Мыгъэ общественнэ чIы­пIэ 13-рэ щагу 34-рэ Адыге­им щызэтырагъэпсыхьанхэу рахъухьэ. ГъэрекIо Мыекъуапэ дэсхэм амал яIагъ чIыпIэ общественнэ зыгъэIорышIэжьынымкIэ чIыпIэ организациехэм амакъэ ащатынэу е ащкIэ онлайн шIыкIэр къызфагъэфедэнэу. Рейтинг мэкъэтыным икIэуххэм ате­тэу урамхэу Красноок­тябрьскэмрэ Пушкиным ыцIэ зыхьымрэ зыщызэуа­лIэхэрэм дэжь щыт скверыр къыхахыгъ. 2021-рэ илъэсым ар зэтырагъэ­псыхьащт, розэ лъэпсэ 200-м ехъу ыкIи нэмыкI къэгъагъэхэр дагъэтIыс­хьащтых. Дизайн-проектым диштэу зыгъэпсэфыпIэ чIыпIэ заули нахь зэты­рагъэпсыхьанэу рахъухьэ. ГущыIэм пае, квадрат метрэ 500-м ехъу зикIы­хьэгъэщт лъэсрыкIо гъогу­хэр агъэпсыщтых, тетIыс­хьапIэхэр дагъэуцощтых, джырэ шапхъэхэм ади­штэ­рэ остыгъэхэр палъэщтых. 2022-рэ илъэсым зэтырагъэпсыхьанхэу зы­фэе псэуа­лъэхэм апае 2021-рэ илъэсым мэлылъфэгъум и 26-м къыще­гъэжьагъэу жъоныгъуакIэм и 30-м нэс онлайн-платформэу za.go­rodsreda.ru зыфиIорэмкIэ амакъэ атын алъэкIыщт. Адыгеим щы­псэоу зы­ныбжь илъэс 14-м шъхьадэкIыгъэр ащ хэлэ­жьэн, апэрэ чэзыоу зэтырагъэпсы­хьажь­мэ шIоигъо чIыпIэр къыхихын ылъэ­кIыщт.