Урысыем финансхэмкIэ иминистрэ иапэрэ гуадзэу Леонид Горниныр Адыгеим и ЛIышъхьэу КъумпIыл Мурат тыгъуасэ Москва щыIукIагъ. Iофтхьабзэм хэлэжьагъэх АР-м финансхэмкIэ иминистрэу Виктор Орловымрэ Адыгеим ыцIэкIэ УФ-м и Къэралыгъо Думэ идепутатэу Владислав Резникрэ.

Республикэ бюджетыр зэрагъэцакIэрэм, бюджет зэфыщытыкIэхэр нахьышIу шIыгъэнхэ, АдыгеимкIэ мэхьанэшхо зиIэ проект заулэмэ мылъку тедзэ къафыхэгъэкIыгъэн зэрэфаем япхыгъэ Iофыгъохэм зэIукIэгъум хэлэжьагъэхэр атегущыIагъэх. Республикэм бюджет чIыфэхэр къыфыхэгъэкIыгъэнхэмкIэ ама­лэу щыIэхэм мыщ шъхьафэу щахэплъагъэх.

КIэлэцIыкIу ибэхэм унэ зэраратырэ къэралыгъо программэр зэрагъэцакIэрэм къытегущыIэзэ, КъумпIыл Мурат къызэриIуагъэм­кIэ, 2013-рэ илъэсым къыщегъэ­жьагъэу 2020-рэ илъэсым нэс бюджет зэфэ­шъхьаф­хэм ямылъкоу сомэ миллион 800-м ехъур а гухэлъым пэIуагъэхьагъ. А уахътэм къыкIоцI нэбгырэ 861-мэ унэхэр арагъэгъотыгъ. Мыгъи кIэлэцIыкIу ибэ 417-мэ унэ къа­ратынэу фитыныгъэ яIэ хъугъэ. Мэхьанэшхо зиIэ мы Iофыгъом изэшIохын пае Адыгеим джыри федеральнэ бюджетым имылъкоу сомэ миллион 428-рэ ищыкIэ­гъэщт.

Джащ фэдэу укъэбзалъэхэр Мыекъуапэ зэрэщагъэкIэжьы­хэрэми мыщ щытегущыIагъэх. Урысые Федерацием и Правительствэ IэпыIэгъу къафэхъузэ, 2019-рэ илъэсым къыщегъэжьагъэу чэщ-зымафэм кубометрэ мин 40 зыукъэбзын зылъэкIыщт апэрэ комплексыр ашIы. 2021 — 2022-рэ илъэсхэм ателъы­тэгъэ IофшIэнхэр ухыгъэнхэмкIэ республикэм сомэ миллиард 1,3-м ехъу ищыкIэгъэщт, 2021-рэ илъэсым сомэ миллион 446,2-м фэещт. Iофыгъоу къаIэтыгъэхэм республикэмкIэ мэхьанэшхо зэряIэр зэIукIэгъум щыхагъэунэфыкIыгъ. АР-м и ЛIышъхьэ ипресс-къулыкъу