Автомобиль гъогухэм яшIынрэ ягъэкIэжьынрэ апае мылъку тедзэ шъолъырхэм къафыхэгъэкIыгъэнэу УФ-м и Правительствэ ыухэсыгъ. УФ-м и Правительствэ иIэпэчIэгъэнэ фонд щыщэу Адыгеим сомэ миллиард 1,4-рэ джыри къыIукIэщт. Мыекъуапэ къэзыухьэрэ автомобиль гъогум ишIын ар пэIуагъэхьащт.

УФ-м и Правительствэ ащ фэдэ унашъор зиштагъэр УФ-м и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары. Владислав Резник ащкIэ ишIуагъэ къызэрэкIуагъэр къэIогъэн фае.

Адыгеим и ЛIышъхьэу КъумпIыл Мурат хигъэунэфыкIыгъ федеральнэ гупчэм мылъку IэпыIэгъоу къытитыщтым мэхьанэшхо зэриIэр. Лъэпкъ проектхэм къащыдэлъытагъэхэр республикэм гъэрекIо зэригъэцэкIагъэхэм епхыгъэу 2021-рэ илъэсымкIэ ипIалъэм къыпэу ипшъэрылъхэр ыгъэцэкIэнхэ ылъэкIыгъ ыкIи 2022 — 2023-рэ илъэсхэмкIэ гухэлъхэм ягъэцэкIэн ыуж ихьагъ.

«УФ-м и Президентэу Владимир Путиным и Джэпсалъэ зэрэщыхигъэунэфыкIыгъэмкIэ, анахьэу анаIэ зытырагъэтыщтхэр автомобиль гъогухэр ары. Мыекъуапэ къэзыухьэрэ гъогум ишIын паий тиреспуб­ликэ мылъку тедзэ къыфыхагъэкIыгъ. Ащ фэдэ IэпыIэгъум ишIуагъэкIэ республикэм игъогухэм язытет нахьышIу шIыгъэнымкIэ ыкIи мэхьанэшхо зиIэ псэуалъэхэм ягъэ­псынкIэ УФ-м и Президент пшъэрылъэу къыгъэуцугъэхэр псынкIэу зэшIотхынхэ тэлъэ­кIы. Ахэм зэу ащыщ Мыекъуа­пэ къэзыухьэрэ гъогур. Рес­публикэм транспортымкIэ иамалхэм ащ нахь заригъэу­шъомбгъущт, транзит транспортымрэ машинэ хьылъэ­хэмрэ нахь макIэу Мыекъуапэ къыдахьэхэ хъущт. Джащ фэдэу республикэм инвестициехэр нахьыбэу къыхалъхьанхэм фэIорышIэщт, къалэм иэкологии нахьышIу ышIыщт», — къыIуагъ Адыгеим и ЛIышъхьэ.

Мыекъуапэ къэзыухьэрэ автомобиль гъогум километрэ 27-рэ икIыхьэгъэщт. Километри 9 фэдиз хъурэ апэрэ Iахьыр 2009-рэ илъэсым агъэпсыгъах. ЯтIонэрэ Iахьым километри 10,4-рэ, ящэнэрэм — километри 7,5-рэ якIыхьэгъэщт.

Мыекъуапэ къэзыухьэрэ гъо­гум ишIын пае бюджет мылъкур атезыгощэрэ комиссиемрэ УФ-м и Правительствэрэ 2020-рэ илъэсым итыгъэгъэзэ мазэрэ 2021-рэ илъэсым имэзаерэ федеральнэ бюджетым мыщ фэдиз мылъку къыхэгъэкIы­гъэнэу аухэсыгъагъ: 2021-рэ илъэсым — сомэ миллион 600, 2022-рэ илъэсым — сомэ миллиард 1,6-рэ, 2023-рэ илъэсым — сомэ миллиард 1,4-рэ. УФ-м и Правительствэ иIэпэчIэ­гъэнэ фонд къыха­гъэкIыгъэ мылъкур къыдыхэлъытагъэу 2021-рэ илъэсым мы гъогум ишIын сомэ миллиарди 2 пэIуагъэхьащт, а мылъкур федеральнэ гупчэм къытIупщыщт.

«Хэгъэгум социальнэ-экономикэ хэхъоныгъэ ышIынымкIэ анахь мэхьанэшхо зиIэ проектхэм ягъэцэкIэн къыз­щыдэлъы­тэгъэ шъолъыр программэхэр нахь псынкIэу пхырыщыгъэнхэм пай мылъку тедзэ къызкIыхагъэ­кIырэр. Мыекъуапэ къэзыухьащт автомобиль гъогури ащ фэдэ проектхэм ахэхьэ. УФ-м и Президент къыгъэуцугъэ пшъэ­рылъхэу апэрэ чэзыоу зэшIохыгъэн фаехэм шъолъыр­хэм ягъогухэм язегъэушъомбгъуни ахэхьэ. Адыгеим ипа­щэхэм а пшъэрылъыр гъэхъа­гъэ хэлъэу агъэцакIэ. АщкIэ щысэу къэп­хьымэ хъущт лъэпкъ проектэу «Щынэгъончъэ ыкIи джырэ шапхъэхэм адиштэрэ автомобиль гъогу­хэр» зыфиIорэр шIуагъэ къы­тэу зэрэпхыращырэр», — къы­Iуагъ Владислав Резник.

Шъугу къэтэгъэкIыжьы къалэу Мыекъуапэ къэзыухьэрэ автомобиль гъогум ишIын лъыгъэ­кIотэгъэным, автомобиль гъогоу «Адыгэкъал — Бжъэдыгъухьабл» зыфиIорэм игъэцэкIэ­жьын, гъогу зэхэкIыпIэхэр Тэхъутэмыкъое районым щыгъэпсыгъэнхэм япхыгъэ Iофыгъохэм Адыгеим и ЛIышъхьэу КъумпIыл Мурат УФ-м и Правительствэ и Тхьаматэ игуадзэу Марат Хуснуллиным гъэрекIо ищылэ мазэ дыриIэгъэ зэIукIэгъум зэрэщытегущыIэгъагъэхэр. Республикэм и ЛIышъхьэ истратегическэ инициативэхэу гъогухэм япхыгъэ проектхэм ягъэцэкIэн тегъэ­псыхьагъэхэм джащыгъум Марат Хуснуллиным къадыригъэштэ­гъагъ.

АР-м и ЛIышъхьэ ипресс-къулыкъу