Адыгэ къуаер къыдэзыгъэкIырэр нахьыбэ хъущт
Мэкъумэщ кооперативэу «Адыгеим икъуаехэр» зыфиIорэм хэхьэрэ предприятие Красногвардейскэ районым щашIы. Щэм хэшIыкIыгъэ гъомылапхъэхэр мыщ къыдигъэкIыщтых.
АР-м мэкъу-мэщымкIэ иминистрэу Къуанэ Анзаур мы мафэхэм ащ щыIагъ, IофшIэныр зынагъэсыгъэм ыкIи гумэкIыгъоу къэуцухэрэм защигъэгъозагъ. Предприятием ипащэу Анцокъо Бислъан Iофхэм язытет министрэм къыфиIотагъ. 2021-рэ илъэсым ишэкIогъу мазэ нэс проектыр аухынэу зэрагъэнафэрэр къыIуагъ.
АР-м мэкъу-мэщымкIэ и Министерствэ къызэрэщыхагъэщыгъэмкIэ, предприятием игъэпсын, игъэкIэжьын ыкIи изегъэушъомбгъун пэIуигъэхьанэу сомэ миллиони 9,9-рэ хъурэ грант къыратыгъ. Джащ фэдэу ищыкIэгъэ Iэмэ-псымэхэр зэригъэгъотынхэ игухэлъ. Программэм къыдыхэлъытагъэу, 2019-рэ илъэсым IофшIэпIэ чIыпIитIу къызэIуахыгъ.
Шъугу къэдгъэкIыжьын, адыгэ къуаер тыди зэрэщызэлъашIэрэр къызфагъэфедэзэ, илъэс пчъагъэхэм ар нэмыкI шъолъырхэм къащыдагъэкIыщтыгъ. Специалистыбэми, цIыф къызэрыкIохэми зэралъытэрэмкIэ, иIэшIугъэкIи, изэхэлъыкIэкIи Адыгеим къыщыдагъэкIырэм ар лъэшэу текIыщтыгъ. «Адыгэ къуай» зытетхэгъэ продукциер джы къызщыдэбгъэкIын плъэкIыщт закъор тиреспублик ары. Непэрэ мафэм ехъулIэу Адыгеим ит предприятиихымэ адыгэ къуаер къыдагъэкIы.
2019-рэ илъэсым ыкIэм УФ-м и Президентэу Владимир Путиныр Адыгеим илIыкIохэм заIокIэм, адыгэ къуаер зэрэIэшIур ыкIи идэгъугъэкIэ пстэуми къазэрэхэщырэр къыхигъэщыгъ. Мыщ епхыгъэ предприятиехэр нахьыбэ хъунхэм, заушъомбгъуным фэшI субсидиеу къафатIупщыхэрэм ахагъэхъонэу УФ-м мэкъу-мэщымкIэ иминистрэ къыфигъэпытэгъагъ.
2020-рэ илъэсым тыгъэгъазэм Урысыем мэкъу-мэщымкIэ и Министерствэ «Урысыем иIэшIугъакIэхэр» зыфиIорэ апэрэ лъэпкъ зэнэкъокъоу зэхищагъэм адыгэ къуаем ятIонэрэ чIыпIэр къыщыдихыгъ ыкIи лъэныкъоу «На всю страну» зыфиIорэмкIэ хагъэунэфыкIырэ чIыпIищ къыдэзыхыгъэхэм ахэфагъ.
Адыгэ къуаер республикэм ибренд. Дунаим къое зэмылIэужыгъо минищ фэдиз къыщыдагъэкIы. Ахэм ащыщэу зыпэпшIын щымыIэ адыгэ къуаем идэгъугъэкIэ ыцIэ чыжьэу Iугъэ. 2012-рэ илъэсым къыщегъэжьагъэу Европэм ар ащэ.
— Агропромышленнэ комплексым хэхъоныгъэ ышIынымкIэ адыгэ къуаем икъыдэгъэкIын мэхьанэшхо етэты. Продукциер тыди щызэлъашIэ, экспортым ылъэныкъокIэ амалышIухэр IэкIэлъых, — еIо Адыгеим и ЛIышъхьэу КъумпIыл Мурат.
ДЕЛЭКЪО Анет.