Адыгэ быракъым и Мафэ мэлылъфэгъум и 25-м игъэкIотыгъэу дунаим щагъэмэфэкIыщт.Республикэм икъэлэ шъхьаIэу Мыекъуапэ щыкIощт мэфэкIым изэхэщэкIо куп изэхэсыгъо унэшъо хэхыгъэхэр щырахъухьагъэх.

Адыгэ Республикэм лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхахьэр зэрищагъ. Рес­публикэ общественнэ движениеу «Адыгэ Хасэр» кIэщакIо зыфэхъугъэ мэфэкIыр адыгэу дунаим тетхэм хагъэунэфыкIы зэрэхъугъэм общественнэ-политикэ мэхьанэу иIэр А. Шъхьэлахъом изэфэхьысыжьхэм ащыхигъэунэфыкIыгъ.

Общественнэ движениеу «Адыгэ Хасэмрэ» республикэм ихэбзэ къулыкъушIэхэмрэ зэгъусэхэу мэфэкIыр хагъэунэфыкIызэ, дунэе мэхьанэу иIэм зыкъиIэтыгъ.

Зэхахьэм къыщыгущыIагъэх Адыгэ Республикэм культурэмкIэ иминистрэ иапэрэ гуадзэу Ольга Гавшинар, Адыгэ Республикэм и Къэралыгъо филармоние ипащэу Къулэ Мыхьамэт, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Адыгеим илъэпкъ театрэу Цэй Ибрахьимэ ыцIэ зыхьырэм ихудожественнэ пащэ иIэнатIэ зыгъэцакIэу Хьакъуй Аслъан, зэхэщэн Iофыгъохэм ахэлэжьэхэрэ Нэхэе Саидэ, Гъу­кIэлI Сусанэ.

ЛIымыщэкъо Рэмэзан зэрэхигъэунэфыкIыгъэу, адыгэ быра­къым и Мафэ лъэпкъхэр зэфещэх. Республикэм иобщественнэ организациехэр чанэу мэфэкIым хэлэжьэщтых. Урысхэр, къэзэкъхэр, къэндзалхэр, ермэлхэр, фэшъхьафхэри мэфэкIым щызэIукIэщтых.

Концертыр

Беданыкъо Замирэрэ ОелI Адамрэ зэращэщт мэфэкI зэхахьэр Адыгэ Республикэм и Къэралыгъо филармоние мэлылъфэгъум и 25-м щыкIощт.

Iофтхьабзэм ирежиссерэу Хьакъуй Аслъан концертыр гъэшIэгъон хъущтэу къытиIуагъ. Тиансамблэ анахь дэгъухэр, артист цIэрыIохэр мэфэкIым хэлэжьэщтых.

Ансамблэхэу «Налмэсыр», «Ислъамыер», «Ащэмэзыр», «Ошъутенэр», «Мыекъуапэ инэфылъэхэр», зэлъашIэрэ пщынаоу ЛIыбзыу Аслъан, орэдыIохэу Беданыкъо Замирэ, Цышэ Зарет, фэшъхьафхэм мэфэкI зэхахьэр къагъэдэхэщт.

Концерт программэр зытхы­гъэу, Адыгэ Республикэм изаслуженнэ артисткэу АфэшIэгъо Фаинэ къытиIуагъ мэфэкIыр Мыекъуапэ зэрэщыкIощт шIыкIэм IэкIыб къэралмэ арыс тилъэп­къэгъухэр, къош республикэхэм ащыпсэухэрэр къызэрэкIэуп­чIэхэрэр.

МэфэкIыр сыхьатыр 12-м филармонием щырагъэжьэщт. Концертым еплъы зышIоигъохэр ыпкIэ амытэу чIагъэхьащтых. Шъукъеблагъэх мэфэкI зэхахьэм.