Урысые Федерацием и Президентэу Владимир Путиныр УФ-м и Федеральнэ ЗэIукIэ илъэс къэс фигъэхьырэ Джэпсалъэм  мэлылъфэгъум и 21-м къеджагъ. Псауныгъэм икъэухъумэн, демографиер, унагъом IэпыIэгъу етыгъэныр анахь шъхьаIэу ащ къыхигъэщыгъэх.АР-м и ЛIышъхьэу КъумпIыл Мурат социальнэ IэпыIэгъоу непэ щыIэхэр лъыгъэкIотагъэ зэрэхъугъэхэм, кIэлэцIыкIухэм апае пособиехэм джыри кIэу къызэрахэхьагъэм къатегущыIэзэ, амал пстэур агъэфедэзэ Адыгеим а IофшIэныр зэрэщылъагъэкIуатэрэр къыIуагъ. Ащ тетэу блэкIыгъэ илъэсым республикэм исым ипроцент 33,2-мэ социальнэ IэпыIэгъур анэсыгъ. Ар нэбгырищ пэпчъ ящэнэрэр арэу мэхъу.

Ныгъом, кIэлэцIыкIугъом Iэпыгъу ягъэгъотыгъэным фытегъэпсыхьэгъэ IофшIэнхэр Адыгеим нахь щагъэлъэшыгъэх, унагъоу зигъот макIэхэм зэрадеIэщтхэ ахъщэр бюджетым щыгъэнэфагъэ хъугъэ. Пособиеу атыхэрэм кIэу къыхэхьагъэхэм ащыщых илъэси 3-7 зыныбжь кIэлэцIыкIухэм апае агъэнэфэгъэ ахъщэ тыныр, унагъоу зигъот макIэм ящэнэрэ ыкIи ащ къыкIэлъыкIорэ сабыеу къихъухьагъэм ыныбжь илъэси 3 мэхъуфэкIэ мазэ къэс къыфакIорэр.

- Непэ къэралыгъом ипащэ къышIыгъэ Джэпсалъэм зэпахырэ узэу дунаир зэлъызыкIугъэм ыуж анахьэу Iоф зыдэшIэгъэн фаехэр щыгъэнэфагъэх, - къыIуагъ КъумпIыл Мурат. –Экономикэм хэхъоныгъэр егъэшIыгъэным, цIыфхэм гъотэу яIэр нахьыбэ хъуным, агъашIэрэм хэхъоным афытегъэпсыхьэгъэ пшъэрылъ гъэнэфагъэхэр къышIыгъэх. ЦIыфхэм якъэгъэнэжьын, якъэухъумэн пстэумэ анахь шъхьаIэу зэрэщытым УФ-м и Президент къыкIегъэтхъы. ЗэкIэ пшъэрылъэу къытфишIырэр ары зытегъэпсыхьагъэр. ТицIыфхэм ящыIакIэ нахьышIу хъуным, шъолъырхэм хэхъоныгъэр ашIыным апае ахэр хэзыгъэ имыIэу дгъэцэкIэнхэ фае.

- УФ-м и Президентэу Владимир Путиным и Джэпсалъэ социальнэ лъэныкъохэр, цIыфхэм ящыIэкIэ-псэукIэ нахьышIу шIыгъэныр анахь шъхьаIэу къызэрэщыхигъэщыгъэр тыгу рихьыгъ. Непэ ащ фэдэ екIолIакIэми мэхьанэшхо зэриIэм щэч хэлъэп, - къыIуагъ  «Адыгеим ибзылъфыгъэхэм я Союз» зыфиIорэ организацием итхьаматэу Вэрэкъо Хьалимэт.