Коронавирусым пэуцужьырэ прививкэм сыдэущтэу зыфэбгъэхьазырыщта ыкIи сыда ащ зыщыбдзые зыкIэмыхъущтыр? Мы упчIэхэм джэуапхэр къаритыжьыгъэх Роспотребнадзорым иэпидемиологие гупчэ научнэ IофшIэнымкIэ ипащэ игуадзэу Александр Гореловым.

? Сыдэущтэу прививкэм зыфэбгъэхьазырыщта? Интернетым инэкIубгъохэм къарыхьагъ вакцинэр зыхэмылъхьэзэ е зыхэплъхьэгъэ къодыеу антигис­тамин уц уешъон фаеу. Ащ узешъокIэ тем­пературэр дэмы­- кIоенэу, мастэр зы­хаIугъэ чIыпIэр мыузынэу ыкIи къэмыпщынэу ары къызэратхырэр. Арэущтэу Iофыр щыта?

А. Г: А къэбарым зыпари шъыпкъагъэ хэлъэп. Вакцинацием зыфэбгъэхьазырыным пае уц уешъонэу щытэп. КъэIогъэн фае, антигистамин уцыр щынагъоу зэрэщытыр ушэтынхэм къагъэлъэгъуагъ, вакцинэм ыуж иммунитетым ащ иягъэ екIы. Антигистамин уцым ешъон фаехэр аллергие зиIэ цIыфхэр ары. Врачым къафыритхыкIыгъэу ащ мафэ къэс ешъохэмэ, прививкэм пае зэпагъэу хъущтэп. Адрэхэр ащ ешъонхэ ищыкIагъэп.

? Прививкэ ышIын гу­хэлъ иIэу цIыфыр пэтхъу-Iутхъу хъугъэмэ сыда ышIэн фаер?

А.Г: ЗыгорэкIэ пэтхъу-Iутхъу уз шъуиIэу шъукъэсымэджа­гъэмэ, вакцинациер охътэ гъэ­нэ­фагъэкIэ щыжъугъэзыемэ нахьышIу. Вакцинэм ихэлъхьэгъуитIум азыфагу пэтхъу-Iутхъу уз къышъупыхьагъэмэ, мэзитIум нэс прививкэр зэкIэпхьан фае. Пэтхъу-Iутхъу узыр псынкIэу зэкIэкIожьыным пае парацетамол уешъон фае. УиIэпкъ-лъэпкъ­хэр мэузхэмэ, ащ ибупрофен уц удешъомэ нахьышIу. Мы уцитIуми плъыр-стырыр ыкIи узыр хагъэжъукIы. ?Вакцинэм иапэрэ дозэ зыхэплъхьагъэу укъэсымэджагъэмэ сыда пшIэн фаер?

А.Г: Ковидым пэшIуекIорэ вакцинэм иапэрэ ыкIи иятIонэрэ хэлъхьэгъухэм азыфагу мэзитIу Iэпэцыпэ илъын фае Мыщ дэжьым къэIогъэн фае, пэтхъу- Iутхъур къызыоузыгъэ нэуж тхьамэфитIу зытешIэкIэ ары ныIэп вакцинэр зызхябгъэлъхьан плъэкIыщтыр. Прививкэ ужым пкъынэ-лынэр къарыунчъэ мэхъу. Ащ пэтхъу-Iутхъу вирусыр къызыхэ­хьажьыкIэ пкъынэ-лынэр ебэнын фаеу мэхъу. Ащ фэдэ мыхъуным пае, узфэсакъыжьын фае.

? Сыд фэдизэу цIыфыр зыфэсакъыжьыгъэми, прививкэ ужым коронавирусыр къызеуталIэкIэ сыда ышIэн ылъэкIыщтыр?

А.Г: Арэущтэу зыхъукIэ ятIо­нэрэ прививкэр пшIы хъущтэп. Апэрэ вакцинэм ишIуагъэ къа­кIоу зыригъажьэрэр мэфэ 32 — 42-рэ зытекIыкIэ ары. Арышъ, Iэпэдэлэл шъумышI, узыр къы­шъупымыхьаным фэшI зышъу­ухъумэжь.

? Ужэ кIоцI плъыр- стыр хъугъэмэ, уицэпкъ­хэм лъыр къадэ­чъымэ, вакцинациер пшIы хъущта?

А.Г: Вакцинацием ар зыпарэкIи иягъэ къекIыщтэп, сыда пIомэ лъынтфэ кIоцIым уколыр халъхьэ. КIэлэцIыкIухэм апэ рагъэткIощт вакцинэр къаугупшысыгъ, ащ иягъэ жэ кIоцIым къекIырэп.

? Бэхэр егъэгумэкIы: цэхэм яIэзэнхэ фае, ау цашIэм дэжь узычIахьэкIэ нэгуихъор зыIупхын фае, ковид къып­пыхьанымкIэ ащ щынагъо къеты. Шъыпкъа адэ, цэм уеIэзэным пае апэ прививкэ пшIын фаеу зэраIорэр?

А.Г: Ар шъыпкъэ. Апэ прививкэ зябгъэшIыни, етIанэ цэхэм уяIэзэн фае. Ау уфэса­къын фае, ужэ кIоцI плъыр-стырэу температурэ къыуитыгъэмэ, вакцинэр ямыгъэшIымэ на­хьышIу.

Къэзыгъэхьазырыгъэр КIарэ Фатим.