Мыекъуапэ щызэнэкъокъущтых
Мэлылъфэгъум и 23 — 25-м Къыблэм атлетикэ онтэгъумкIэ изэнэкъокъу Мыекъуапэ щыкIощт.
Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан къытиIуагъ зэнэкъокъум хъулъфыгъэхэр, бзылъфыгъэхэр зэрэхэлэжьэщтхэр. Къырым, Севастополь, Краснодар краим, Къалмыкъым, Волгоград хэкум, Адыгеим яспортсменхэр зэIукIэщтых.
Чыржьын Мухьарбый фэгъэхьыгъ
1972-рэ илъэсым Олимпиадэ джэгунхэм дышъэр къащызыхьыгъэ кощхьэблэ батырэу Чыржьын Мухьарбый фэгъэхьыгъэ зэнэкъокъур Мыекъуапэ щыкIощт.
Илъэс 13 — 15 зыныбжьхэр атлетикэ онтэгъум щызэнэкъокъущтых.
Адыгэ къэралыгъо университетым спортымкIэ иунэ зэIукIэгъухэр щызэхащэщтых: урамыр Первомайскэр, 208-рэ.
Спортыр зышIогъэшIэгъонхэр зэхэщакIохэм рагъэблагъэх. Къыблэм спортымкIэ иветеранхэр, атлетикэ онтэгъум щыцIэрыIохэр, сэнаущыгъэ зыхэлъхэу Урысыем ихэшыпыкIыгъэ командэ хэтхэр зэнэкъокъум щызэIукIэщтых.