Партиеу «Единэ Россиемрэ» Урысые Федерацием псэолъэшIынымкIэ ыкIи псэупIэ-коммунальнэ хъызмэтымкIэ и Министерствэрэ шэм­бэт шIыхьафхэр мэлылъфэгъум и 24-м Урысыем ишъолъырхэм ащы­зэ­хащэщт. Партием иволонтер гупчэхэм ахэтхэри, пэшIорыгъэшъэу зымакъэ зытыгъэхэри ащ фэдэ Iофтхьабзэхэм ахэлэжьэщтых. «Шъолъыр плъыжьхэр» зиIэ сымэджэщхэм ящагухэр ахэм агъэкъэбзэщтых, нэжъ-Iужъхэм IэпыIэгъу афэхъущтых. Хабзэ зэрэхъугъэу, ахэм парк­хэр, скверхэр, социальнэ учреждениехэм къапэIулъ чIыпIэ­хэр, щагухэр агъэкъэбзэщтых, чъыгхэмрэ куандэхэмрэ агъэтIысхьащтых. Партием и Ге­неральнэ совет исекретарэу Андрей Турчак УФ-м и Пра­вительствэ и Тхьаматэ игуадзэу Марат Хуснуллиным бэмышIэу зэIукIэгъоу дыриIагъэм ащ фэгъэхьыгъэу къыщи­Iуагъ.

«Федеральнэ проектэу «Къэ­лэ щыIэкIэ зэтегъэпсыхьагъ», партийнэ проектэу «Джырэ шапхъэхэм адиштэрэ къэлэ псэукI» зыфиIохэрэм къады­хэлъытэгъэ псэуалъэхэу зэтырагъэпсыхьанэу щытхэм — щагухэм, скверхэм, псыIушъохэм, цIыфхэм зызыщагъэпсэфырэ чIыпIэхэм шIыхьафхэр ащыкIощтых», — къыIуагъ Андрей Турчак.

Марат Хуснуллиным зэрэ­хигъэунэфыкIыгъэмкIэ, ежьыри шIыхьафым хэлэжьэщт.

«Урысые шIыхьафыр игъоу зэхащэу сэлъытэ. ЦIыфхэу ащ хэлажьэхэрэр ящагухэм, зыщыпсэурэ чIыпIэхэм нахь афэсакъыщтых», — къыIуагъ ащ.

«Федеральнэ проектэу «Къэ­лэ щыIэкIэ зэтегъэпсыхьагъ», партийнэ проектэу «Джырэ шап­хъэхэм адиштэрэ къэлэ псэукI» зыфиIохэрэм Адыгеим лъэшэу мэхьанэ щараты. ШIыхьафхэр республикэм щызэхэщэгъэнхэр а проектхэм язы Iахьэу щыт, — къыIуагъ партием ишъолъыр гъэцэкIэкIо комитет ипащэу, Мыекъуапэ икъэлэ Совет идепутатэу АфэшIэгъо Рэмэзан. — Пар­тием иволонтер гупчэ хэтхэм цIыфхэм языгъэпсэфыпIэ чIыпIэхэр гъэкъэбзэгъэнхэмкIэ рес­публикэм имуниципалитетхэм шIыхьафхэр ащызэхащэнхэу рахъухьэ. ГущыIэм пае, партиеу «Единэ Россием» хэтхэу Мыекъуапэ дэсхэр къэлэ паркым иехыпIэ игъэкъэбзэн хэлэжьэщтых. КIымафэм осыбэ къызэресыгъэм епхыгъэу ахэм IофшIэн икъу агъотынэу сэгугъэ».