Компаниеу «ЭкоЦентрэм» мы мафэхэм къэхалъэхэр къе­гъэкъабзэх.

Мэлылъфэгъу мазэр къызихьагъэм къыщыублагъэу хэкI кубометрэ 500 фэдиз ащ иавтомашинэхэм Iуащыгъ.

— Быслъымэн ыкIи чыристан дин мэфэкIхэр къэблагъэх. Ахэм япэгъо­кIэу шъолъыр операторым къэхалъэхэр къегъэ­къа­бзэх. Муниципалитетхэм зэзэгъыныгъэу адэт­шIы­гъэм тетэу, хэкIэу ыкIи чъыг къутэмэ гъугъэу зэ­­тыратэкъуагъэхэр ащ фытегъэпсыхьэгъэ техни­кэр дгъэфедэзэ Iутэщы, — къыIуагъ ООО-у «ЭкоЦентрэм» и Адыгэ шъо­лъыр къутамэ ипащэу Алыбэрд Налбый.

Ащ фэдэу хэушъхьафыкIыгъэу хэкIыр Iузыщы зышIоигъохэр мы телефонхэмкIэ къытеонхэ алъэ­кIыщт: 8(8772)21-06-04, 8-918-425-96-22. Джащ фэдэу, ООО-у «ЭкоЦентрэм» иинтернет нэкIубгъоу https://adygea.clean-rf.ru зыфиIорэр агъэфедэми хъущт.