КIэлэцIыкIу гъогу фыкъоныгъэхэр дэгъэзыжьыгъэнхэм фэIорышIэрэ федеральнэ проектэу «Щынэгъончъэным илабораторие» къыдыхэлъытагъэу техническэу ыкIи методическэу зэтегъэпсыхьэгъэ автобус цIыкIу АР-м и Гупчэу кIэлэцIыкIухэм гъэсэныгъэ тедзэ зыщарагъэгъотырэм къыратыгъ.

Ащ епхыгъэ мэфэкI Iофтхьабзэм хэлэжьагъэх Адыгэ Рес­публикэм гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусаннэ, Адыгеим и Къэралыгъо автоинспекцие ипащэу Александр Курпас, Урысые экспертнэ гупчэу «Движение без опасности» зыфиIорэм проектнэ IофшIэнымкIэ ипащэу Валентина Кульбицкаяр, общественнэ организациехэм ялIыкIохэр, гъогурыкIоным иныбжьыкIэ инспекторхэр (ЮИД).

КIэлэцIыкIу гъогу-транспорт фыкъоныгъэхэр дэгъэзыжьыгъэн­хэм адэлэжьэщт хэушъхьафыкIыгъэ гупчэхэр гъэпсыгъэнхэм мы федеральнэ проектыр фэIорышIэ. Ащ икIэщакIор экспертнэ гупчэу «Движение без опасности» зыфиIорэр ары. Ащ игъусэх автостраховщикхэм я Урысые союз, УФ-м хэгъэгу кIоцI IофхэмкIэ и Министерствэ и Къэралыгъо автоинспекцие, Урысыем гъэсэныгъэмрэ шIэныгъэмрэкIэ и Министерствэ. Мы проектыр Урысыем ишъо­лъыр 60-мэ ащыпхыращы, джы Адыгеири къахэхъуагъ.

Адыгеим и Къэралыгъо автоинспектор шъхьаIэ мэфэкI Iофтхьабзэм хэлажьэхэрэм шIуфэс гущыIэхэр къапигъохыгъэх. Мы хъугъэ-шIагъэм тишъо­лъыркIэ мэхьанэ зэриIэр ащ хигъэунэфыкIыгъ. Александр Курпас къызэрэхигъэщыгъэмкIэ, гъогурыкIоным ишапхъэхэр кIэ­лэцIыкIухэм арагъэшIэнхэмкIэ, егъэджэным щагъэфедэщт Iэмэ-псымэхэр Iэрыфэгъу хъунхэмкIэ кощырэ комплексэу «Щынэгъончъэным илабораторие» IэпыIэгъушIу къафэхъущт.

Министрэм игуадзэу Пэрэныкъо Сусаннэ зэхэщакIохэм зэрафэразэр къыIуагъ. Джащ фэдэу «Щынэгъончъэным илабораторие» иамалкIэ IофшIэным шIыкIакIэхэр къыфагъотызэ, кIэлэцIыкIухэм ямызакъоу, на­хьыжъхэри зэрэрагъэджэщтхэр ащ къыхигъэщыгъ.

КIэлэцIыкIухэм гъэсэныгъэ тедзэ зыщарагъэгъотырэ Гупчэм ипащэ автобусым иIункIыбзэхэр мэфэкI шIыкIэм тетэу зыраты­жьыхэ нэуж Iофтхьабзэр концерткIэ лъагъэкIотагъ. Ар Мые­къуапэ икIэлэцIыкIу къэшъокIо купхэм ыкIи Урысые зэнэкъо­къоу «Безопасное колесо» зыфиIорэм текIоныгъэ къыщыдэзыхыгъэ ныбжьыкIэ инспекторхэм къагъэхьазырыгъ.

МэфэкI Iахьыр заухым, Iоф­тхьабзэм хэлажьэхэрэр щагум къыдэхьагъэх. Урысые экспертнэ гупчэу «Движение без опасности» зыфиIорэм проектнэ IофшIэнымкIэ ипащэу Валентина Кульбицкаям мобильнэ комплексым ыкIоцI зэрэ­зэтегъэ­псыхьагъэр нэрылъэгъу къафишIыгъ, ащ ит пкъыгъо пэпчъ зыфэIорышIэрэр къафиIотагъ. Автобусым ыкIоцI кушъхьэ­фа­чъэхэр, самокатхэр, конусхэр, гъогурыкIоным ишап­хъэхэр къизыIотыкIырэ стендхэр, Iэнэ-макетхэр, нэмыкI­хэри итых.

Адыгеим икъалэхэм ыкIи ирайонхэм арыт еджапIэхэм Iофтхьабзэр защызэхащэщт мафэхэр мы охътэ благъэм агъэнэфэщтых. ШъушIэным пай: «Щынэгъончъэным илабораторие» — кIэлэцIыкIухэр зыхэфэрэ гъогу хъугъэ-шIагъэхэм япчъагъэ нахь макIэ шIыгъэным фэIорышIэрэ зэхэт программ.