Адыгэ автоном хэкур загъэпсыгъэр илъэси 100 зэрэхъурэм ыкIи программэу «Адыгэ Республикэм иныбжьыкIэхэм яхэгъэгу шIу алъэгъоу пIугъэнхэр» зыфиIорэм къадыхэлъытагъэу АР-м и Лъэпкъ тхылъеджапIэ Iофтхьабзэу «Государственный суверенитет Республики Адыгея: история становления» зыфиIорэр щыкIуагъ.

Ащ пшъэрылъ шъхьаIэу иIагъэр Адыгеим икультурэ ыкIи итарихъ бай къизыIотыкIыхэрэ гушъхьэбайныгъэхэр ягъэшIэгъэн­хэр, къызщыхъугъэхэ шъолъырыр шIу алъэгъоу ныбжьыкIэхэр пIугъэнхэр ары.

Iофтхьабзэм хэлэжьагъэх кIэ­лэцIыкIухэм яфитыныгъэхэр къэухъумэгъэнхэмкIэ Уполномоченнэу Адыгеим щыIэ Александр Ивашиныр, лицееу N 34-м ипащэ игуадзэу, тарихъ шIэныгъэ­хэмкIэ кандидатэу Илья Ващенкэр, кIэлэеджакIохэр.

Лъэпкъ тхылъеджапIэм иIофышIэу Емыж Аминэт егъэджэн Iофтхьабзэр зэрищагъ.

— Къызщыхъугъэ хэгъэгум итарихъ зышIэу ыкIи ащ шъхьа­кIафэ фэзышIырэ цIыфыр къэралыгъом игражданинэу алъытэ. Арышъ, шъо шъузщыщ Адыгеим советскэ лъэхъаным иIэгъэ тари­хъым шъущыдгъэгъозэнэу тызэ­хэхьагъ. Ащ епхыгъэу жъугъотыщт шIэныгъэм тапэкIэ шъуиIэщт статусыр елъытыгъэн ылъэ­кIыщт, — къыIуагъ Аминэт.

КраеведениемкIэ ыкIи лъэпкъ литературэмкIэ отделым иIофышIэу Пэнэшъу Руслъан къыгъэхьазырыгъэ къэгъэлъэгъонэу «Адыгея: от автономии к респуб­лике» зыфиIорэм ныбжьыкIэхэр нэIуасэ фишIыгъэх.

Нэужым тарихъ шIэныгъэхэмкIэ кандидатэу Илья Ващенкэм гущыIэр лъигъэкIотагъ. Адыгеим къэралыгъо гъэпсыкIэ иIэ хъуным лъапсэу фэхъугъэм ар игъэкIотыгъэу къытегущыIагъ. Адыгэ лъэпкъымкIэ мэхьанэшхо зиIэ хъугъэ-шIагъэу мыр зэрэщытыр, ащ къыфэкIонымкIэ гъогоу къыкIугъэр къыIотагъэх.

НыбжьыкIэхэм упчIэу къатыгъэхэм яджэуапхэр кIэлэегъа­джэм къаритыжьыгъэх. НыбжьыкIэхэм япатриотическэ пIуныгъэ гъэпытэгъэнымкIэ мыщ фэдэ Iофтхьабзэхэм яшIуагъэ къэкIо­нэу тэгугъэ.

НэкIубгъор зыгъэхьазырыгъэр Iэшъынэ Сусан.