Лъэпкъ проектхэм къадыхэлъытагъэу гъэсэныгъэм, культурэм ыкIи спортым яучреждениеу мыщ щагъэпсыгъэхэм Адыгеим и ЛIышъхьэ ащыIагъ, яIофшIэн зэрэзэхащэрэр зэригъэлъэгъугъ.

Сабый нэбгырэ 240-рэ зычIэ­фэнэу ашIыгъэ кIэлэцIыкIу Iыгъы­пIэу N 6-р ары апэрэ чIыпIэу АР-м и ЛIышъхьэ зэкIолIагъэр. Лъэпкъ проектэу «Демография» зыфиIорэм ишIуагъэкIэ мы учреж­дениер ашIыгъ. Федеральнэ, республикэ ыкIи муниципальнэ бюджетым къыхэхыгъэ сомэ миллиони 168-рэ мыщ пэIуагъэ­хьагъ.

КъатитIоу зэтет унэр аужырэ шапхъэхэм адиштэу зэтегъэ­псыхьагъ. КIэлэцIыкIухэр зыща­Iыгъхэр дахэу зэIухыгъэх, спорт ыкIи музыкальнэ залхэр, медицинэм иIофышIэ зычIэс кабинетыри хэтых. Учреждениер зыдэт щагури зэтегъэпсыхьагъ.

АР-м гъэсэныгъэмрэ шIэныгъэмрэкIэ иминистрэу КIэрэщэ Анзауррэ Адыгэкъалэ ипащэу ЛIыхэсэ Махьмудрэ къызэра­IуагъэмкIэ, гъэсэныгъэм иучреждение къызэрэзэIуахыгъэм ишIуагъэкIэ чэзыум хэтхэм япчъагъэ хэпшIыкIэу нахь макIэ хъугъэ.

Сабыйхэр зычIэсхэр, джэгупIэхэр, шхапIэр КъумпIыл Мурат къыплъыхьагъ. Физкультурэм ыкIи музыкэм алъэныкъо­кIэ кIэлэцIыкIухэм Iоф зарадашIэрэр зэригъэлъэгъугъ ыкIи ахэм сэнаущыгъэ зэрахэлъыр къыхигъэщыгъ.

Учреждениер зэрэзэтырагъэ­псыхьагъэм осэшIу фишIыгъ ыкIи кIэлэцIыкIухэм япсауныгъэ къэухъумэгъэным фэшI санитарнэ шапхъэхэр агъэцэкIэнхэм мэхьанэшхо зэриIэр хигъэунэфыкIыгъ. Ахэр физкультурэм пыщагъэ хъунхэм мэхьанэшхо зэриIэр, арагъэшхырэм лъып­лъэнхэ зэрэфаер къыIуагъ.

IэпыIэгъу къазэрафэхъурэмкIэ АР-м и ЛIышъхьэ зэрэфэразэхэр кIэлэцIыкIу IыгъыпIэм Iоф щызышIэхэрэм къыраIуагъ. Гъэсэныгъэ платформэу «Вдохновение» зыфиIорэм ифедеральнэ инновационнэ площадкэ кIэлэцIыкIу IыгъыпIэу «Нэбзыир» зэрэхэфагъэр къыхагъэщыгъ. Ащ ишIуагъэкIэ къэшъонымкIэ, сурэтшIынымкIэ ыкIи IэкIыб къэралыгъуабзэхэм язэгъэшIэн­кIэ кIэлэцIыкIухэм гъэсэныгъэ тедзэ арагъэгъотын амал щыIэ хъугъэ.

ДЕЛЭКЪО Анет.