АР-м и ЛIышъхьэу КъумпIыл Мурат Адыгэкъалэ дэт физкультурнэ ыкIи псауныгъэр зыщызэтырагъэуцожьырэ комплексыкIэм еблэгъагъ. Дунаим ичемпионэу, Европэм гъогогъуиплIэ текIоныгъэ къыщыдэзыхыгъэ, Дунаим и Кубок гъогогъуитIо къызыфагъэшъошэгъэ Лъэцэр Хьазрэт ыцIэкIэ зэхащэгъэ дзюдомкIэ зэнэкъокъур республикэм ипащэ къызэIуихыгъ.

УФ-м и Президентэу Владимир Путиныр кIэщакIо зыфэхъу­гъэ лъэпкъ проектхэм ащыщэу «Демографием» хэхьэрэ федеральнэ проектэу «Спортыр щыIэныгъэм ишапхъ» зыфиIорэм къыдыхэлъытагъэу ар ашIыгъ. Федеральнэ, республикэ ыкIи муниципальнэ бюджетхэм къа­хэхыгъэ мылъкумкIэ псэуалъэр агъэпсыгъ. Мыщ чIыпIэ 200 иI, спорт лъэпкъ зэфэшъхьафхэм афытегъэпсыхьэгъэ зал дыхэт.

Iофтхьабзэм икъызэIухын фэгъэхьыгъэ зэхахьэм къекIолIагъэх республикэм испортсмен ыкIи итренер цIэрыIохэр, на­хьыжъхэр, Адыгэкъалэ щыпсэухэрэр.

КъумпIыл Мурат хьакIэхэм ыкIи зэнэкъокъум хэлажьэхэрэм закъыфигъазэзэ къалэм, респуб­ликэм яспорт щыIакIэ мы спорткомплексыкIэм чIыпIэшхо зэрэщиубытыщтым ицыхьэ зэрэтелъыр хигъэунэфыкIыгъ. Спорт­сменхэм гъэхъэгъэшIухэр ашIынхэм, кIэлэцIыкIухэр спортым пыщагъэ хъунхэм псэуалъэу ашIыгъэр зэрэфэIорышIэщтыр къыIуагъ. КIэлэцIыкIу спортым хэхъоныгъэ ышIынымкIэ «Единэ Россием» ипартийнэ проектхэм яшIогъэшхо къызэрыкIорэр къы­хигъэщыгъ.

— Спорт псэолъакIэм ишIуа­гъэкIэ цIыфхэм япсауныгъэ агъэпытэн амал яI. Урысыем и Пре­зидентэу Владимир Путиным къызэрэхигъэщэу физическэ культурэр цIыфхэм ящыIэныгъэ шапхъэ хъун фае. Спортым тишъолъыр сыди­гъуи чIыпIэшхо щеубыты. А шэн-хабзэхэр гъэпытэгъэнхэм непэ тыпылъ, тапэкIи зэрифэшъуашэу тынаIэ тедгъэтыщт, — къы­Iуагъ КъумпIыл Мурат.

Спортсмен цIэрыIоу Лъэцэр Хьазрэт къэзэрэугъоигъэхэм закъыфигъэзагъ. Спортым хэ­хъо­ныгъэ ышIыным зиIахьышхо хэлъ республикэм ипащэхэм ар къафэрэзагъ. Зэнэкъокъум хэлажьэхэрэм гъэхъэгъэшIухэр ашIынхэу къафэлъэIуагъ.