Къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм къыдыхэлъытагъэу гъэцэкIэжьынхэр зыщыкIогъэ лъэпкъ культурэм и Гупчэ республикэм и ЛIышъхьэ екIолIагъ. Мыщ изэтегъэпсыхьан сомэ миллион 71-м ехъу пэIуагъэхьагъ.

IофшIэнэу зэхащагъэхэм къа­тегущыIагъэх Адыгеим культу­рэмкIэ иминистрэу Аулъэ Юрэ, АР-м мэкъу-мэщымкIэ и Министерствэ ипащэ иапэрэ гуадзэу Сергей Шопиныр. Гупчэр зычIэт псэуалъэм бэшIагъэу гъэцэ­кIэжьынхэр ищыкIэгъагъэх. Къэралыгъо программэм зэрэ­хэлэжьагъэхэм ишIуагъэкIэ инженернэ коммуникациехэр, шъхьангъупчъэхэр ыкIи пчъэхэр зэблахъугъэх, чIыпIэ 500 зиIэ концертнэ залыр непэрэ шапхъэхэм адиштэу зэтырагъэ­псыхьагъ. Ащ нэмыкIэу «Единэ Россием» ипроектэу «Культура малой Родины» зыфиIорэм игъэцэкIэн къыдыхэлъытагъэу муниципалитетым сомэ миллион 1,5-рэ къыIэкIэхьагъ. А мылъкумкIэ учреждением иматериальнэ-техническэ базэ агъэпытагъ.

АгъэкIэжьыгъэ культурэм иучреждение амалэу IэкIэлъ хъугъэр республикэм ипащэ зэригъэлъэгъугъ, лъэпкъ Iэпэ- Iасэхэм якъэгъэлъэгъон екIо­лIагъ. ГъэцэкIэжьынхэм ауж культурэм иучреждение къызэрэзэIуахыжьырэм фэгъэхьыгъэ мэфэкI зэхахьэм КъумпIыл Мурат хэлэжьагъ.

Iофтхьабзэм къе­кIолIагъэхэм шIуфэс гущыIэхэмкIэ закъыфигъазэзэ социальнэ инфраструктурэр нахьышIу шIыгъэныр, цIыфхэм Iэрыфэгъу щыIакIэ яIэныр пшъэ­рылъ шъхьаIэу зэрэщытхэр республикэм ипащэ къыIуагъ.

— Къэралыгъом ипащэу Владимир Путиным пчъагъэрэ къыхигъэщыгъ сыд фэдэрэ къиныгъо теолIагъэми, ткIуа­чIэ зэхэлъэу ыпэкIэ тылъыкIотэн зэрэфаер, ар музыкальнэ искусствэми фэгъэ­хьыгъ. Мы илъэ­сым джыри культурэм иучреждение 15-мэ игъэкIотыгъэ гъэцэкIэжьынхэр ятшIылIэщт, зы кIэу тшIыщт, — къыIуагъ Адыгеим и ЛIышъхьэ.

Къэралыгъо академическэ ансамблэу «Налмэсым» къытыгъэ концертым къэзэрэугъоигъэ­хэр ягуапэу еплъыгъэх.

Мы мэфэ дэдэм республикэм ипащэ саугъэт комплексэу «ТекIоныгъ» зыфиIорэм екIо­лIагъ ыкIи ащ къэгъагъэхэр кIэрилъхьагъ. Ащ къыдыхэлъытагъэу саугъэтым къыпэIулъ чIыпIэри къыплъыхьагъ. Адыгэкъалэ къыIэкIэхьэгъэ федеральнэ грантым ишIуагъэкIэ ар зэтырагъэпсыхьагъ. Проектым игъэцэкIэн сомэ миллион 66-рэ пэIуагъэхьагъ.

ДЕЛЭКЪО Анет.