Шъолъыр гъэIорышIэнымкIэ Гупчэр, республикэм игъэзет шъхьаIэхэу «Адыгэ макъэмрэ» «Советскэ Адыгеимрэ» зэгъусэхэу IофтхьэбзакIэ аублэ – Гупчэм иIофшIэн фэгъэхьыгъэ къэбарыр тхьамафэм зэ къыхаутызэ ашIыщт.

Интернет амалхэу гъэзетхэм яIэхэри ащкIэ къызфагъэфедэщт. «Адыгэ макъэм» къихьэрэ къэ­бархэм шъхьэу яIэщтыр мыщ фэд — «Шъолъыр гъэIорышIэнымкIэ Гупчэм къеты», «Советскэ Адыгеим» — «ЦУР в эфире».

Тхьамафэм зэ, мазэм плIэ шъолъыр гъэIорышIэнымкIэ Гупчэм Iофэу ышIэрэм имызакъоу, цIыфхэм къафэфедэщт къэбархэр, яупчIэхэм яджэуапхэр нэкIубгъо хэхыгъэм итыщтых, гъэзетхэм яинтернет нэкIубгъохэми къарыхьащтых.

Электрон амалхэмкIэ къэбархэр зэзыгъашIэхэрэм анэмыкIэу интернетыр зымыгъэфедэшъухэрэми джы къэбарыр алъыIэсын ылъэкIыщт. Шъугу къэдгъэкIы­жьын, шъолъыр гъэ­Iоры­шIэнымкIэ Гупчэр цIыфхэм ягумэкIыгъохэр нахь псынкIэу зэшIохыгъэнхэм пае зэхащагъ, къэралыгъо хэбзэ къулыкъухэм ягъусэхэу ащ иIофышIэхэм пшъэрылъхэр агъэцакIэх, гумэкIыгъуабэмкIэ IэпыIэгъу афэ­хъух.

ТапэкIэ агъэнафэхэрэм ащыщ телерадиокомпаниеу «Адыгеим» щагъэхьазырырэ хэушъхьафыкIыгъэ программэм Гупчэм зэшIуихырэм фэгъэхьыгъэ нэ­кIубгъо хэгъэхьэгъэныр. МэщлIэкъо Саид.