Япсауныгъэ изытет ауплъэкIугъ
Лъэпкъ проектэу «Демографием» къыдыхэлъытагъэу Урысые акциеу «Будь здоров» зыфиIорэр республикэм щырекIокIы.
Псауныгъэм ыкIи медицинэ профилактикэмкIэ Адыгэ республикэ Гупчэр, Мыекъопэ къэралыгъо технологическэ университетым имедицинэ институт щеджэрэ студент-волонтерхэр зэгъусэхэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Комплекс-Агро» зыфиIорэм щыIагъэх.
Ащ иIофышIэ пэпчъ медицинэ, нэмыкI уплъэкIунхэр ыкIун амал иIагъ. Ащ хэхьэх антропометриер, лъыдэкIуаер уплъэкIугъэныр, холестеринэу ыкIи глюкозэу лъым хэлъыр гъэунэфэгъэныр, ВИЧ-р иIэмэ зэригъэшIэным фэшI тестирование ыкIуныр, нэмыкIхэри. Джащ фэдэу шIоигъоныгъэ зиIэ пэпчъ врач-терапевтым гущыIэгъу фэхъун ылъэкIыгъ. ПстэумкIи нэбгырэ 80 ауплъэкIугъ.
— Iофтхьабзэм пшъэрылъ шъхьаIэу иIэр нэбгырэ пэпчъ ипсауныгъэ изытет лъыплъэным мэхьанэшхо зэриIэр агурыдгъэIоныр ары. Мазэм ыкIэм нэс акциер кIощт, — къыIуагъ медицинэ профилактикэмкIэ Адыгэ республикэ Гупчэм иврач шъхьаIэу Мэт Заремэ.
Абрэдж Сэтэнай.