Урысые олимпиадэм зэрифэшъуашэу зыкъыщагъэлъэгъуагъ
Мы мафэхэм информатикэмкIэ зэхащэгъэ Урысые олимпиадэм иаужырэ уцугъоу Москва щыкIуагъэм изэфэхьысыжьхэр къэнэфагъэх.
Московскэ физико-техническэ институтым мэлылъфэгъум и 6-м къыщегъэжьагъэу и 11-м нэс зэнэкъокъур щыкIуагъ. УцугъуитIоу ар гощыгъагъэ, шъолъыр 73-мэ къарыкIыгъэ кIэлэеджэкIо 384-рэ хэлэжьагъ. Я 9 — 11-рэ классхэм ащеджэхэрэр ары зишIэныгъэхэр къэзгъэлъэгъуагъэхэр.
Олимпиадэм ифинал ихьагъэх Мыекъопэ лицееу N 8-м ия 10-рэ класс щеджэхэрэ Антон Росинымрэ Антон Лободарэ.
Антон Росиным шIэныгъэ куухэр къыгъэлъэгъуагъэх ыкIи олимпиадэм хагъэунэфыкIырэ чIыпIэр къыщыдихыгъ.
Джащ фэдэу экономикэмкIэ Урысые олимпиадэм ипризер хъугъэ мы лицей дэдэм ия 10-рэ класс щеджэрэ Андрей Гогуадзе.
Информатикэмрэ экономикэмрэ зилъэныкъо шъхьаIэу щыт къэралыгъом иапшъэрэ еджапIэу зыфаехэм ушэтынхэр амытхэу кIалэхэр чIэхьанхэ амал яIэ хъугъэ.
Гурыт еджапIэхэм ащеджэрэ кIэлэеджакIохэм апае илъэс къэс олимпиадэхэр зэхащэх. Ахэр уцугъуиплIэу зэтеутыгъэх. ЫпэрапшIэу еджапIэхэм яшIэныгъэхэр ащаушэты, нэужым муниципальнэ ыкIи шъолъыр уцугъохэм анахь дэгъоу закъыщызыгъэлъагъохэрэр Урысые олимпиадэм хэлажьэх. ДЕЛЭКЪО Анет.