2021-рэ илъэсым лъэпкъ проектэу «Щынэ­гъончъэ ыкIи шэпхъэшIухэм адиштэрэ гъогу­хэр» зыфиIорэм игъэкIэжьыгъэ паспорт аштагъ.

ЫпэкIэ ащ зэреджэщтыгъэхэр «Щынэгъончъэ ыкIи шэпхъэшIу­хэм адиштэрэ автомобиль гъогухэр». УФ-м и Президент и Указэу «О национальных целях развития Российской Федерации на период до 2030 года» зыфиIорэм джы ар диштэ хъугъэ. Мыщ фэгъэхьыгъэ пресс-зэIукIэ «Адыгеяавтодорым» ипащэу Алексей Корешкиным зэхищагъ.

Илъэс зэкIэлъыкIохэм пхыра­щырэ лъэпкъ проектым фа­шIы­гъэ зэхъокIыныгъэхэр цIыф­хэм алъагъэIэсымэ ашIоигъоу зэрэзэхэхьагъэхэр ащ ипэублэ пса­лъэ къыщыхигъэщыгъ. Нэужым игъэкIотыгъэу агъэкIэжьыгъэ проектым къытегущыIагъ.

— Лъэпкъ пшъэрылъэу «Iэ­рыфэгъу ыкIи щынэгъончъэ псэукIэр» зыфиIорэм илъэгапIэхэм алъыIэсыгъэным мыр фытегъэпсыхьагъ. 2024-рэ илъэ­сым ехъулIэу къэлэ агломерациешхохэм ягъогу Iахьхэр про­цент 85-м къыщымыкIэу зэтегъэпсыхьагъэнхэр пшъэрылъ шъхьаI, — къыIуагъ Алексей Корешкиным.

Лъэпкъ проектым федеральнэ проекти 4 хахьэщтыгъэмэ, джы паспортыкIэм ар 6-м нигъэсыгъ. УФ-м транспортымкIэ и Министерствэ пхырищыщтыгъэ проектэу «Шъолъыр ыкIи чIыпIэ гъогу сеть» ыкIи «Общесистемные меры развития дорожного хозяйства» зыфиIо­хэрэр джыри лъигъэкIотэщтых. Пресс-зэIукIэм къызэрэщаIуагъэмкIэ, федеральнэ проектыкIэхэу «Развитие федеральной магистральной сети» ыкIи «Мо­дернизация пассажирского транспорта в городских агломерациях» зыфиIохэрэм япхырыщын 2021-рэ илъэсым рагъэ­жьагъ.

Алексей Корешкиным къызэриIуагъэмкIэ, федеральнэ проектэу «Шъолъыр ыкIи чIыпIэ гъогу хъытыур» зыфиIорэм къы­дыхэлъытагъэу, шъолъыр гъогухэм ыкIи къэлэ агломерациехэм ягъогухэм язытет шэпхъэшIухэм адиштэу зэтыра­гъэпсыхьащтых.

— 2021-рэ илъэсым кило­мет­рэ мин 16 зикIыхьэгъэ псэуа­лъэ­хэр арых программэм ха­гъэ­хьагъэхэр, — къеIуатэ «Адыгеяавтодорым» ипащэ. — Адыгэ Республикэр пштэмэ, 2022-рэ илъэсым агъэцэкIэ­жьынэу агъэнэфэгъэ объектхэу а программэм хэфагъэхэр: шъолъыр гъогухэмкIэ —– километрэ 52,3-рэ, къалэу Мые­къуапэкIэ — километри 5,2-рэ.

IэрышI псэуалъэхэм язытет шапхъэхэм адиштэу зэтегъэпсы­хьэгъэнхэм анаIэ тырагъэтыщт. Къызэхэоным ищынагъо зы­шъхьарыт лъэмыджхэр 2022-рэ илъэсым агъэцэкIэжьынхэу, 2023-рэ илъэсым шъолъыр ыкIи чIыпIэ гъогухэр ашIынхэу проектым къыдыхэлъытагъэх.

Хьылъэзещэ автомобильхэр автомат шIыкIэм тетэу зыщащэ­чыхэрэ чIыпIэхэм ягъэпсын, сурэт ыкIи видео тезыхырэ ка­мерэхэм япчъагъэ ахэгъэ­хъогъэныр проектэу «Общесистемные меры развития дорожного хозяйства» зыфиIорэм къыхеубытэх.

Шъугу къэдгъэкIыжьын, Урысыем и Къэралыгъо автоинспекцие и ГъэIорышIапIэу АР-м щыIэм республикэм ифеде­ральнэ, шъолъыр ыкIи муниципальнэ гъогухэм ащигъэнэфэгъэ чIыпIэхэм шапхъэхэр зэращау­къуагъэр къыхэзгъэщырэ камерэ 56-рэ икIыгъэ илъэсым атырагъэуцуагъ. Мы илъэсым джыри 18 ахагъэхъонэу агъэнафэ.

Ащ нэмыкIэу, IофшIэным щагъэфедэщт технологие ыкIи материал анахь дэгъухэм якъэ­щэфын епхыгъэ зэзэгъыныгъэу зыкIатхэхэрэм япчъагъэ хагъэ­хъонэу ащыт. «Адыгеяавтодорым» зэкIэ ыгъэцэкIэжьырэ автомобиль гъогухэм мыжъо-­мастичнэ асфальт ащегъэфедэ. Ащ ишIуагъэкIэ гъогухэм язытет бэрэ зыпкъ итыщт.

Федеральнэ проектыкIэу «Модернизация пассажирского транспорта в городских агломерациях» зыфиIорэм къызэ­рэщыдыхэлъытагъэмкIэ, къэлэ автобусхэм, троллейбусхэм ыкIи трамвайхэм япарк гъэкIэжьыгъэнымкIэ Урысыем транспортымкIэ и Министерствэ Iэпы­Iэгъу къафэхъущт. ЦIыфхэр зе­зыщэрэ организацием къыщэфыщт транспортым ыуасэ ипроцент 60-р лизинг шIыкIэм тетэу ыгъотыщт. Зэнэкъокъу шIыкIэм тетэу къэлэ агломе­рацие 13 къыхахыгъ (цIыфы­шъхьэ пчъагъэу тикъэлэ агломерациехэм ащыпсэурэр зэрэмакIэм къыхэкIэу, Адыгеир ахэфэнэу хъугъэ), ахэм 2021-рэ илъэсым транспортыкIэ 412-рэ (автобус 305-рэ ыкIи троллейбуси 107-рэ) къаратыщт.

Лъэпкъ проектым джыри зы лъэныкъуакIэ къыхэхьагъ — «Развитие федеральной магистральной сети» зыфиIорэр. Федеральнэ мэхьанэ зиIэ автомобиль гъогухэм яIахьхэу пстэумкIи километрэ 1810,6-рэ хъурэр 2024-рэ илъэсыр къэмысызэ гъэпсыгъэнхэр ыкIи гъэцэкIэжьыгъэнхэр мыщ къыхеубытэ. Ащ щыщэу «Росавтодорым» — километрэ 1440,5-р, ГК-у «Автодорым» — километрэ 370,1-р агъэцэкIэжьыщтых.

Алексей Корешкиным зэрэхигъэунэфыкIыгъэмкIэ, лъэпкъ проектым изэхэтыкIэ изакъоп зэхъокIыныгъэ зыфашIыгъэр, ар зыщыпхыращырэ шъолъыр­хэми ахэхъуагъ. 2021-рэ илъэ­сым Санкт-Петербург къыхэ­хьагъ ыкIи, зэрэхъугъэмкIэ, УФ-м исубъект 84-мэ лъэпкъ проектыр щыпхыращы.

Ащ илъэныкъо анахь шъхьа­Iэхэм ащыщыр агъэцэкIэрэ Iоф­шIэнхэм язытет къэралыгъом щыпсэурэ цIыфхэм осэшIу къыфашIыныр ары. Гъогухэм язытет, Iэрыфэгъоу ыкIи щы­нэгъончъэу зэрэщытхэм цIыфхэр зэрэрыразэхэр проектым ипаспорт икIыгъэ илъэсым къы­дэхьагъэх.

— ГъогушIхэм япшъэрылъ шъхьаIэр транспорт инфраструктурэ дэгъу, пытэ ыкIи Iэрыфэгъу шъолъырхэм ащыгъэпсыгъэныр ары. Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу объектыр зэрагъэцэкIэжьыгъэ къэбарыр дэгъум итамыгъэ хъугъэ. Арышъ, бюджет мылъкоу проектым ипхырыщын пэIухьэрэр чапычым ыкIи тыралъхьэрэ асфальт сантиметрэм нэсэу къызэра­лъытэрэм лъэплъэх, — къыIуагъ «Адыгеяавтодорым» ипащэу Алексей Корешкиным.

Iэшъынэ Сусан.