Пенсионерэу IофшIапIэм Iутыр ащ къыIукIыжьымэ, ипенсие индек­сацие зэрашIыщтым фэгъэхьыгъэ упчIэхэр бэу къытIокIэх. Ащ фэшI шапхъэу ащ пылъхэр джыри зэ шъугу къэдгъэкIыжьыхэмэ тшIоигъу.

СтрахованиемкIэ пенсиехэм афэгъэхьыгъэ федеральнэ хэ­бзэгъэуцугъэм диштэу, 2016-рэ илъэсым къыщыублагъэу Iоф­шIапIэхэм аIут пенсионерхэм япенсиехэмрэ ахэм атегъэхъогъэ ахъщэ тын гъэнэфагъэхэмрэ индексациеу адрэхэм афа­шIырэр къадэмылъытагъэу къа­фэкIох. Пенсионерыр IофшIапIэм къызыIукIыжьыкIэ, ащ IотыфэкIэ страхованиемкIэ пенсиехэм къахэхъогъэ пстэур къы­фыдалъытэжьы.

2017-рэ илъэсым законым зэхъокIыныгъэу фашIыгъэхэм ишIуагъэкIэ, IофшIапIэм пен­сионерыр къызщыIукIыжьыгъэ мазэм къыкIэлъыкIорэм иапэрэ мафэ къыщыублагъэу пенсиер къыфыкIалъытыкIыжьы. Арэу щытми, ар мэзиплI тешIагъэу ары къатынэу зырагъажьэрэр. IофшIэпIэ чIыпIэр къезытыщтыгъэм ПенсиехэмкIэ фондым тхылъэу фигъахьыхэрэм Iоф адашIэн фаеу зэрэщытыр ары ащ фэдиз зыкIытырагъашIэрэр.

ГущыIэм пае, пенсионерыр мэлылъфэгъу мазэм IофшIапIэм къыIукIыжьыгъэмэ, ар зыщылажьэщтыгъэм жъоныгъокIэ мазэм зэфэхьысыжьэу фондым ыгъахьырэм ар джыри Iоф­шIапIэм Iутэу итхэгъэщт. Мэ­къуогъум ышIырэ отчетыр ары цIыфыр зэрэIумытыжьыр къызщигъэлъэгъонэу хъурэр. Ащ ыуж, бэдзэогъу мазэм, пенсиер къыкIалъытыкIыжьышъ, шышъхьэIум индексациер къыдэлъытагъэу къыфэкIонэу регъа­жьэ. Ащ жъоныгъокIэ, мэкъуогъу ыкIи бэдзэогъу мазэхэм апаи ахъщэ тедзэ къыдэкIожьыщт.

Шъугу къэдгъэкIыжьын, илъэс къэс, шышъхьэIу мазэм, Iоф­шIапIэхэм аIут пенсионерхэм япенсиехэр фондым къыкIелъы­тыкIыжьых. Ащ пае лъэIу тхылъ атын ищыкIагъэу щытэп. Пенсиехэм къахахъорэр нэбгырэ пэпчъ зэфэшъхьаф, шъхьадж фагъэнэфагъэм елъытыгъ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу