«Россети Кубань» вольт инхэр къэзытырэ иподстанциеу Адыгеим ит­хэм ягъэкIэжьын 2021-рэ илъэсым ригъэжьагъ. ПстэумкIи 9-мэ лъэ­хъа­ным диштэрэ оборудованиер ащигъэуцунэу ары зэри­гъэнэ­фа­гъэр.

Ахэм шъолъырым иэкономикэ хэхъоныгъэхэр ышIынхэм зиIахь мымакIэу хэзылъхьэрэ хъызмэтшIэпIэшхохэм электричествэр араты.

2021— 2023-рэ илъэсхэм а IофшIэнхэр компанием зэшIуихыщтых, зэкIэмкIи сомэ мил­лиарди 4,2-рэ апэIуигъэхьащт. Киловатт 35-рэ кIуачIэ зиIэ подстанциеу «Кужорская» зыфиIорэм игъэкIэжьын рагъэ­жьагъ. Ащ Мыекъопэ районым ипсэупIитфымэ, ахэм нэбгырэ 4000 ащэпсэу, электричествэр аIэкIегъахьэ. Джащ фэдэу пчэнхэр зыщаIыгъхэу, ахэм щэу къатырэм гъомылапхъэхэр зыщыхашIыкIырэ хъызмэтшIапIэу «Мирный-Адыгея» зыфиIорэр епхыгъ.

Энергетикхэм трансформаторитIу кIэу щагъэуцущт. Ахэм яшIуагъэкIэ кIуачIэу яIэр фэ­диплIыкIэ нахьыбэ хъущт. НэмыкI псэуалъэу подстанцием Iоф езыгъашIэхэрэри агъэкIэ­жьыщтых, электричествэм икIуа­пIэу ащ хэкIырэ километрэ 11 зэблахъущт.

Охътэ благъэм ашIэнэу агъэ­нэфагъэхэм ащыщ Мыекъуапэ иподстанциехэу «Северная», «Черемушки», Мыекъопэ ыкIи Джэджэ районхэм электричествэр язытыхэрэу «Тульская», «Садовая», «Комбизавод» зыфиIохэрэм ягъэкIэжьын. Ащ фэ­дэ зэхъокIыны­гъэхэр афашIыщтых Тэхъутэмыкъое ыкIи Теуцожь районхэм яподстанциехэу «ИКЕА», «Энем», «Адыгейская» зыфи­Iохэрэми.

2023-рэ илъэсым республи­кэм электроэнергиер къезытырэм ипроцент 15-р гъэкIэжьыгъэ хъущт. Ащ ишIуагъэкIэ кIуа­чIэхэм мегавольтампери 196,4-рэ къахэхъонышъ, 2023-рэ илъэ­сым 312,6-м нэсыщт.