Хьасанбый тыфэгушIо
Европэм дзюдомкIэ и Федерацие хъулъфыгъэхэм ятренер анахь дэгъур къыхихыгъ.
Урысыем дзюдомкIэ ихэшыпыкIыгъэ командэ итренер шъхьаIэу Тао Хьасанбый «Хъулъфыгъэхэм ятренер анахь дэгъу» зыфиIорэ щытхъуцIэр къыфагъэшъошагъ.
2020-рэ илъэсыр Европэм и Федерацие зызэфехьысыжьым, Тао Хьасанбый тренер анахь дэгъоу къызэрэхахыгъэм тигъэгушIуагъ.
Тао Хьасанбый Къэбэртэе- Бэлъкъарым къыщыхъугъ. Адыгэ къэралыгъо университетым физкультурэмрэ дзюдомрэкIэ и Институт къыухыгъ. Кобл Якъубэ лъапсэ зыфишIыгъэ бэнэпIэ еджапIэм зызэрэщигъэсагъэм рэгушхо.
Олимпиадэ джэгунхэм джэрзыр къащызыхьыгъэ Тао Хьасанбый Урысыем спортымкIэ изаслуженнэ мастер, Урысые Федерацием, Адыгэ Республикэм язаслуженнэ тренер.
Португалием икъалэу Лиссабон щыкIогъэ зэхахьэм Тао Хьасанбый къыщыфэгушIуагъэх, къыфаусыгъэ щытхъуцIэр къэзыушыхьатырэ тхылъхэр къыщыратыжьыгъэх.
2020-рэ илъэсым Европэм итренер анахь дэгъоу Тао Хьасанбый къызэрэхахыгъэм фэшI Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэр, ныбджэгъухэр, тигъэзетеджэхэр фэгушIох.
Опсэу, Хьасанбый! Нарт лъэпкъэу узыщыщым ыцIэ спортышхом лъагэу щыоIэты, гъэхъагъэу пшIырэмкIэ тызыщыпсэурэ Урысыем щытхъур къыфэохьы. Тхьэм бэгъашIэ, насыпышIо уешI!