Батырым иджэрз
ТIуапсэ щапIугъэ Михаил Игольниковым Европэм дзюдомкIэ изэнэкъокъу джэрзыр къыщихьыгъ.
Урысыем ихэшыпыкIыгъэ командэ хэтэу кг 90-м нэс къэзыщэчыхэрэм якуп Михаил Игольниковыр щыбэнагъ.
Грецием, Чехием къарыкIыгъэ спортсменхэм апэрэ зэIукIэгъуитIур къашIуихьыгъ. Голландием щыщэу, дунаим апэрэ чIыпIэр къыщыдэзыхыгъэ бэнакIом М. Игольниковыр текIуагъ. Финалныкъом Грузием къикIыгъэ бэнакIом щыIукIагъ, текIоныгъэр М. Игольниковым къыдихынэу хъугъэп.
Ящэнэрэ чIыпIэм икъыдэхын фэгъэхьыгъэ зэIукIэгъум Сербием щыщ бэнакIом щенэкъокъугъ. М. Игольниковыр дунаим ичемпионэу щыт серб бэнакIом текIуагъ, Европэм иджэрз медаль къыфагъэшъошагъ, иIэпэIэсэныгъэ тренерхэм къыхагъэщыгъ.
Урысыем изаслуженнэ тренерэу, Адыгэ къэралыгъо университетым физкультурэмрэ дзюдомрэкIэ и Институт къэзыухыгъэ Нэгъуцу Джамболэт бэнэкIо лъэшхэм атекIогъэ М. Игольниковым итренер.
Михаил Игольниковым Адыгеим ныбджэгъушIухэр щыриIэх. Мыекъопэ бэнэпIэ еджапIэм къэкIо, тиспортсменхэм ахэтэу Iоф зыдешIэжьы.
Тигъэзетеджэхэм, спортым пылъхэм ацIэкIэ М. Игольниковым тыфэгушIо, имедальхэм ахигъэхъонэу фэтэIо.