Зэнэкъокъур кIэухым фэкIоми, упчIэу щыIэр нахьыбэ мэхъу. «Зенит» нэмыкIэу адрэ клубхэм рэхьат яIэп.

Апшъэрэ купым щешIэхэрэ командэхэм я 26-рэ зэIукIэгъу­хэр мэлылъфэгъум и 17 — 18-м яIагъэх.

КIэуххэр

«Ротор» — «Динамо» — 0:3, «Локомотив» — «Ростов» — 4:1, «Ахмат» — «Химки» — 3:1, «Краснодар» — «Зенит» — 2:2, «Урал» — «Рубин» — 0:1, «Шъачэ» — ЦСКА – 2:1, «Арсенал» — «Тамбов» — 4:0, «Спартак» — «Уфа» — 0:3.

Ижъырэ адыгэ къалэу Шъачэ иклуб иешIакIохэу Нобоа, пенальтикIэ, Юсуповым я 54-рэ такъи­къым ЦСКА-м икъэлапчъэ Iэгуа­ор дадзагъ. Дивеевым я 78-рэ такъикъым «Шъачэ» икъэлапчъэ Iэгуаор дидзагъэми, ЦСКА-р текIоныгъэм нахь пэчыжьагъ. «Шъачэ» нахь дэгъоу ешIагъ.

«Рубин» иешIакIоу Йевтич я 45-рэ такъикъым «Урал» икъэлапчъэ Iэгуаор дидзагъ. «Рубин» итренер шъхьаIэу Л. Слуцкэм къызэриIуагъэу, командэр апэ итхэм ахэуцон имурад.

Хэта зэкIэкIощтыр?

Апэ ишъы зышIоигъохэр бэ мэхъух, ау хэта зэкIэкIощтыр?

«Краснодар» 2:0-у «Зенит» текIощтыгъ. Ионовым зым зыр нахь дэхэжьэу тIогъогогъо хъагъэм Iэгуаор дидзагъ. Азмун я 76-рэ, Мостовоим я 86-рэ та­къикъ­хэм «Краснодар» икъэлап­чъэ Iэгуаор дадзи, пчъагъэр 2:2 хъугъэ. «Краснодар» иухъумакIо­хэм хэукъоныгъэ бащэ ашIыгъ. Апшъэрэ купым ухэт зыхъукIэ, нахь цыхьэшIэгъоу уешIэн фае.

«Локомотив» зэкIэкIон имурадэп. «Ростов» ыуж къызышIуи­хьыщтхэм ягупшысэ. «Спартак» ауж къинэхэрэм ащыщэу «Уфа» 3:0-у къызэрэтекIуагъэм къыхэд­гъэ­щырэр апшъэрэ купым «Уфа» къыхэнэжьыным ишъыпкъэу зэрэфэбанэрэр ары.

«Ротор» гумэкIыгъуабэ иI. Ко­ман­­дэ лъэшхэм адешIэн фае. Апшъэрэ купым чIыпIэр щычIинэщтэу спортым хэшIыкI фызиIэмэ къаIо.

«Краснодар» ешIэгъухэр къе­хьылъэкIыщтых. «Рубин», ЦСКА, «Шъачэ», «Ростов» аIукIэщт. «Спартак», «Локомотив», ЦСКА, нэмыкIхэм зэIукIэгъу гъэшIэгъонхэр яIэщтых. Ауж къинэщт команди 4-р тэшIэ, ау апэ ишъыщтхэр, медальхэр зыхьыщтхэр къэшIэ­гъуае. Арэущтэу зэрэхъугъэр нахьышIу, зэнэкъокъум икIэух тшIогъэшIэгъонэу тылъыплъэщт.

ЧIыпIэхэр

1. «Зенит» — 55 2. «Локомотив» — 49 3. «Спартак» — 47 4. «Рубин» — 46 5. ЦСКА – 46 6. «Динамо» — 46 7. «Шъачэ» — 43 8. «Химки» — 38 9. «Ростов» — 37 10. «Краснодар» — 35 11. «Ахмат» — 35 12. «Урал» — 30 13. «Арсенал» — 23 14. «Уфа» — 20 15. «Ротор» — 18 16. «Тамбов» — 13.

Я 27-рэ зэIукIэгъухэр

24.04 «Зенит» — «Ротор» «Динамо» — «Химки» «Тамбов» — «Локомотив» «Урал» — «Ахмат» 25.04 «Спартак» — ЦСКА «Ростов» — «Арсенал» «Рубин» — «Краснодар» «Уфа» — «Шъачэ».

Клуб пэпчъ ешIэгъуи 4 къыфэнагъ. 2020 — 2021-рэ илъэс зэнэкъокъур футбол ешIакIохэм жъоныгъуакIэм и 30 — 31-м аухынэу щыт.