Адыгеим икIэлэегъэджэ анахь дэгъур къызыщылъэгъощт зэнэкъокъур Адыгэ кIэлэегъэджэ колледжэу Андырхъое Хъусен ыцIэ зыхьырэм тыгъуасэ щырагъэжьагъ. Республикэм ирайонхэм ыкIи икъалэхэм текIоныгъэ къащыдэзыхыгъэ кIэлэегъаджэхэр арых мыщ хэлажьэхэрэр. Ахэр зэкIэмкIи нэбгырэ 19 мэхъух. Мы илъэсым нэбгырэ тIурытIу къызэрыкIыгъэ районхэри ахэтых.

Iофтхьабзэр къызэIуихыгъ АР-м гъэсэныгъэмрэ шIэныгъэм­рэкIэ иминистрэ иапэрэ гуадзэу Евгений Лебедевым. КIэлэегъа­джэхэм, кIэлэпIухэм яIоф­шIэнкIэ хэхъоныгъэхэр ашIынхэм, яшIэныгъэхэм ахагъэхъоным пае мыщ фэдэ зэнэкъокъу­хэр, семинар, егъэджэн зэ­фэшъхьаф­хэр зэрафызэхащэхэрэр къы­Iуагъ. Ащ ишIуагъэкIэ гъэсэныгъэм исистемэ хэхъоныгъэхэр зэришIыхэрэр къыхигъэщыгъ.

— КIэлэегъэджэ сэнэхьатым мэхьанэ ин зэриIэр зэкIэми тэшIэ, сыда пIомэ къыткIэхъу­хьэрэ лIэужхэм шIэныгъэ языгъэгъотырэр, щыIэныгъэ гъогум тезыгъахьэрэр кIэлэ­егъаджэр ары. Егъэджэным исистемэ гъунапкъэ зэримыIэр дэгъоу тэшIэ. Илъэс къэс шэпхъакIэхэр тиIофшIэн къыхэхьэх, ахэм задедгъэштэн, ыпэкIэ тылъыкIотэн фае. Муниципальнэ уцугъом текIоныгъэ къыщыдэшъухи, мыщ шъукъызэрыкIуагъэм шIэныгъэ куу зэрэшъуиIэр къеушыхьаты, — къыIуагъ Евгений Лебедевым.

«2021-рэ илъэсым икIэлэегъэ­джэ анахь дэгъу» зыфиIорэм зыщызыушэтынэу къекIолIагъэ­хэм ягъэхъагъэхэм джыри аха­гъэхъонэу, ыпэкIэ лъыкIотэнхэу, зэрифэшъуашэу зыкъагъэлъэгъо­нэу ар къафэлъэIуагъ.

Гъэсэныгъэм иIофышIэхэм республикэмкIэ япрофсоюз организацие илIыкIоу Устэ Тимур нэужым гущыIэ ратыгъ. 1980-рэ илъэсым къыщегъэжьагъэу мы зэнэкъокъум икIэща­кIохэм зэрахэтхэр, ащ зэрэрыгушхохэрэр къыIуагъ. КIэлэегъа­джэм иIофшIэн осэ ин зэрэ­фэпшIын фаер къыхигъэщыгъ.

Джащ фэдэу Адыгэ кIэлэегъэ­джэ колледжэу Андырхъое Хъусенэ ыцIэ зыхьырэм ипащэу Къэгъэзэжь Мурат, «2020-рэ илъэсым Урысыем икIэлэегъэ­джэ анахь дэгъу» зыфиIорэм къыщыхэщыгъэу Сергей Левченкэр ыкIи блэкIыгъэ илъэсхэм «Адыгеим икIэлэегъэджэ анахь дэгъу» зыфиIорэм текIоныгъэ къыщыдэзыхыгъэхэм Iофтхьабзэм къекIолIагъэхэм шIуфэс къарахыгъ ыкIи яшIэныгъэхэр зэрифэшъуашэу къагъэлъэгъонэу къафэлъэIуагъэх.

Зэнэкъокъум къыдыхэлъытагъэу «Здравствуйте, это я!» зыфиIорэ лъэныкъомкIэ кIэлэегъаджэхэм нэужым заушэтыгъ. Джащ фэдэу методическэ семинархэр, класснэ сыхьатхэр зэхащэщтых, урокхэр къатыщтых. Тхьамафэм къыкIоцI республикэм икIэлэегъэджэ анахь дэгъухэр зэнэкъокъущтых. Мэлылъфэгъум и 29-м Iофтхьабзэр аухыщт, текIоныгъэ къыдэзыхырэм ахъщэ шIухьафтын къызэрэфагъэшъошэщтым дакIоу, Урысые зэнэкъокъум хэлэжьэнымкIэ фитыныгъэ иIэ хъущт.

ДЕЛЭКЪО Анет.

Сурэтыр Iэшъынэ Аслъан тырихыгъ.