УФ-м и Президентэу Владимир Путиным хэбзэ къулыкъухэм япащэхэм закъыфигъазэзэ, социальнэ лъэныкъомкIэ Iофхэм язытет тхьапэм тетхагъэмкIэ зыщамыгъэгъуазэу, еджапIэхэр, сымэджэщхэр, IэзапIэхэр къакIухьэзэ зэпстэур ежьхэм ашъхьэкIэ зэрагъэлъэгъунэу, гущыIэм пае, унагъом икIэлэцIыкIу IыгъыпIэм ичэзыу хигъэуцощтмэ е еджапIэм чIэхьанэу аригъэтхыщтмэ, ащ пае гъогоу ыкIурэр акIунышъ, къинэу хэтыр аушэтынэу къариIуагъ.

— ИмыщыкIагъэу, мэхьанэ зимыIэ шапхъэхэр Iухыгъэнхэ фае, ахэм цIыфхэр аушъхьакIух. Техническэ, административнэ е зэхэщэн Iофэу пылъхэр ахэм ящыкIагъэхэп. Игъом ыкIи икъоу IэпыIэгъу агъотыныр ары анахь шъхьаIэр. Специалистэу цIыфхэм IэпыIэгъу язытыхэрэри къиныгъохэм ашIомынэнхэм тыпылъын фае. ГущыIэм пае, врачхэм, кIэлэ­егъа­джэхэм тхьэпэ зехьаным яуахътэ инахьыбэр тырагъэ­кIодэнэу щы­тэп, цIыфхэм апылъынхэ фае, — къыIуагъ къэралыгъом ипащэ.

Владимир Путиным зэри­лъытэрэмкIэ, еджапIэхэм, поликлиникэхэм, учреждениехэм, цIыфхэм IофшIэпIэ чIыпIэхэр ягъэгъотыгъэнхэмкIэ гупчэхэм яIофшIакIэ нахьышIу хъуныр шъолъырхэм япащэхэм екIолIа­кIэу къагъотырэм бэкIэ епхыгъ. Ахэм яIофшIэн нахьышIу зэрэ­хъугъэри охътабэ темышIэзэ цIыфхэм зэхашIэн фаеу зэрэщытыми Президентым къыкIигъэтхъыгъ.

ЦIыфхэм ящыIакIэ нахьышIу хъуным фытегъэпсыхьагъэу шъо­лъырхэм ащызэшIуахыхэрэм зэфагъэ хэлъэу уасэ афашIыщт, цIыфхэм яшIошIхэр къыдалъытэщтых.