Саугъэтхэм ыкIи тарихъ чIыпIэхэм я Дунэе мафэ ехъулIэу волонтер движениеу «Тлъапсэ къэтэжъугъэухъум» зыфиIорэм илIыкIохэмрэ АР-м икультурнэ кIэн ипсэуалъэхэм якъэухъумэнкIэ ыкIи ягъэфедэнкIэ и ГъэIорышIапIэ икъулыкъушIэхэмрэ зэгъусэхэу Мыекъопэ районым ит поселкэу Усть-Сахрай пэмычыжьэу щыт дольменхэм ащыIагъэх. Ащ къыдыхэлъытагъэу мы чIыпIэр агъэкъэбзагъ.

— Титарихъ зэрэбгъэлъэпIэн фэе зы щысэу мыр щыт, — къыIуагъ Адыгеим и ЛIышъхьэ ыкIи Iофтхьабзэм хэлэжьа­гъэхэм зэкIэми афэрэзагъ.

Мыщ фэдэ акциехэм язэхэщэн мэхьанэшхо зэриIэр КъумпIыл Мурат хигъэунэфыкIыгъ. Сыда пIомэ, мыщ фэдэ чIыпIэхэм хъызмэт IофшIэнэу ащагъэцакIэхэрэм, цIыфхэм пшъэдэкIыжь амыхьэу зэрэзекIохэрэм къыхэкIыкIэ дольмен псаоу къэнагъэхэм япчъагъэ заул ныIэп зэрэхъурэр.

— Арэу щытми тичIыгу артефакт пчъагъэ хэлъ ыкIи археологхэмкIэ ар Меккэу къэнэжьы. Сэ сигупсэ къуа­джэу Улапэ дэжь зыщетIэхэм тарихъ мэхьанэшхо зиIэ ижъы­рэ Iэмэ-псымэхэр, пкъы­гъохэр къычIахыгъагъэх, ахэр непэ Эрмитажым иэкспонат шъхьаIэх, — къыщитхыгъ Къум­пIыл Мурат и Инстаграм нэкIубгъо.