Гурыт еджапIэр къэзыухырэ кIэлэеджакIохэм зыкI къэралыгъо ушэты­ныр атыным ифитыныгъэ къязытырэ сочинениер мэлылъфэгъум и 15-м республикэм щатхыгъ. ЗэкIэмкIи мы илъэсым нэбгырэ 1780-мэ заушэтыгъ. ЗипсауныгъэкIэ ауж къинэрэ зы нэбгырэ изложение ытхыгъ.

Iофтхьабзэр санитарнэ-эпидемиологическэ шапхъэхэм адиштэу зэхащагъ. Темэр Рос­обрнадзорым ыгъэнэфагъ, ушэтыныр рагъэжьэнымкIэ такъикъ 15 иIэу ар кIэлэ­еджакIохэм араIуагъ. Зыми темытхыкIыгъэу, темэу къатефагъэм елъытыгъэу ежьхэм яшIошI къыраIотыкIызэ зэхагъэ­уцон, зэлъашIэрэ цIыфхэм ягущыIэхэр агъэфедагъэхэмэ, ахэм алъэкъуацIэ шIокI имыIэу кIэтхэгъэн фэягъэ. Хэгъэгу е дунэе литературэр къызфагъэфедэхэзэ темэм купкIэу иIэр къыраIотыкIыным мэхьанэшхо ратыгъ.

БлэкIыгъэ илъэсхэм гурыт еджапIэр къэзыухыгъэхэми джащ фэдэу сочинениер атхын амал яIагъ. Мыщ зэфэхьысыжьэу фэхъущтым елъытыгъэу зыкI къэралыгъо ушэтыным екIолIэщтых. Сочинениер зыфэмытхыгъэ­хэр, Iофтхьабзэм ушъхьагъу зэфэшъхьаф­хэмкIэ къе­мыкIолIэшъугъэхэр жъо­ныгъуакIэми и 5-м ыкIи и 19-м атхыжьын амал яIэщт.

Сочинением итхын мы илъэсым я 7-у зэхащэ. БлэкIыгъэ илъэс­хэм афэдэу ар тыгъэгъазэм зэхащэ­нэу щытыгъ, ау пандемием ыпкъ къикIыкIэ мэлы­лъфэгъум къа­хьыгъ.

ДЕЛЭКЪО Анет.