Анахь дэгъоу зыкъэзыгъэлъэгъуагъэхэр къэнэфагъэх
«Студентхэм ягъатх» зыфиIорэ фестивалым изэфэхьысыжьхэр мы мафэхэм къэнэфагъэх. Мэлылъфэгъум и 5-м къыщегъэжьагъэу и 9-м нэс Адыгэ къэралыгъо университетым ар щыкIуагъ. Мэфитфым къыкIоцI республикэм ит гъэсэныгъэм иучреждениехэм якомандэ 20-мэ сэнаущыгъэу ахэлъымкIэ зыкъагъэлъэгъуагъ. Творчествэм епхыгъэ къэгъэлъэгъони 120-рэ фэдизкIэ заушэтыгъ.
Зэо лъэхъаным къаIощтыгъэ, классическэ ыкIи нэмыкI орэдхэр къаIуагъэх. Театральнэ къэгъэлъэгъон зэфэшъхьафхэмкIи фестивалыр баигъэ.
Мы фестивалыр студентхэмкIэ анахь гъэшIэгъонэу, мэхьанэшхо зэратырэмэ ащыщ. Адыгэ лъэпкъ факультетым истуденткэу Къумыкъу Джэнэт очнэ шIыкIэм тетэу мы Iофтхьабзэм апэрэу хэлажьэ, гъэрекIо пэIудзыгъэ шIыкIэм тетэу ар зэхащэгъагъ.
— Фестивалым зэрифэшъуашэу зыфэдгъэхьазырыгъ, мафэ къэс репетициехэр тшIыщтыгъэ. Фестивалым къекIолIэгъэ цIыфхэр къызэрэтпэгъокIыгъэхэм, Iэгу къызэрэтфытеуагъэхэм тагъэгушхозэ зыкъэдгъэлъэгъуагъ, — еIо Джэнэт.
Iофтхьабзэм изэфэхьысыжьхэр мэфэкI шIыкIэм тетэу кIуагъэ. Лъэныкъо зэфэшъхьафхэмкIэ текIоныгъэ къыдэзыхыгъэхэм щытхъу тхылъхэр, дипломхэр афагъэшъошагъэх.
Анахь дэгъухэр къыхахынхэр жюрим IэшIэх къыфэхъугъэп, сыда пIомэ, зым нахьи адрэм нахь гъэшIэгъонэу зыкъагъэлъэгъуагъ. ОсэшI купым хэтыгъэх «Российская студенческая весна» зыфиIорэм ишъолъыр программэрэ АКъУ-м культурэмкIэ и Гупчэрэ япащэу, АР-м культурэмкIэ изаслуженнэ IофышIэу Мурэтэ Лидие, АР-м изаслуженнэ артисткэу, «Налмэсым» балетымкIэ ирепетиторэу Шъхьаплъэкъо Тэмарэ, Адыгеим и Лъэпкъ театрэ ирежиссер шъхьаIэу, Абхъазым изаслуженнэ IофышIэу Исупэ Тимур, нэмыкIхэри.
Зэфэхьысыжьхэм къызэрагъэлъэгъуагъэмкIэ, апэрэ чIыпIэр къыдэзыхыгъэр инженернэ-физическэ факультетым икоманд ары. ЯтIонэрэ чIыпIэр зыфагъэшъошагъэр социальнэ технологиемкIэ ыкIи зекIонымкIэ ифакультет ары, ящэнэрэ хъугъэ АКъУ-м и Мыекъопэ къэралыгъо гуманитар-техническэ колледж истудентхэм якомандэ.
«Студентхэм ягъатхэ» адыгэхэм анэмыкIэу урысхэр, Гурыт Азием хэхьэрэ къэралыгъохэм ялIыкIохэр ыкIи нэмыкIхэр хэлэжьагъэх. Мыщ фэдэ Iофтхьабзэхэм мэхьанэшхо яI, сыда пIомэ искусствэм ныбжьыкIэхэр зэфещэх, яныбджэгъуныгъэ агъэпытэ.
ХагъэунэфыкIырэ чIыпIэхэр къыдэзыхыгъэхэр фестивалым и Гала-концерт хэлэжьагъэх. Апэрэ хъугъэ инженернэ-физическэ факультетым икомандэ Нижний Новгород щыкIощт финалым зыфигъэхьазырыщт.