Зэрэдунаеу гумэкIыгъо хэзыдзэгъэ узэу коронавирусым пэшIуекIорэ вакцинэхэр Урысыем ишъолъырхэм зэкIэми аIэкIэлъ. УФ-м и Президентэу Владимир Путиным пшъэрылъэу къыгъэуцугъэм диштэу вакцинациер къэралыгъом жъугъэу щырекIокIы.

Адыгеим псауныгъэр къэухъу­мэгъэнымкIэ и Министерствэ къызэритыгъэмкIэ, мы узыр къямыутэлIэнымкIэ агъэфедэрэ вакцинэу «Спутник V» зыфи­Iорэр ары республикэм щахалъхьэрэр, ар икъоу къаIэ­кIэхьэ.

Шъугу къэдгъэкIыжьын, эпидемиологием ылъэныкъокIэ шъолъырым иIофхэм язытет елъытыгъэу, ыпэкIэ щыIэгъэ режимым къыдыхэлъытэгъэ шапхъэхэр Адыгеим нахь щыгъэ­шъэбэгъэнхэу унашъо ашIыгъ. Ау цIыфхэм нэгуихъохэр аIу­лъын­хэ, илъэс 65-м зыныбжь шIокIыгъэхэр ыкIи хэужъыныхьэгъэ уз зиIэхэр яунэхэм арысынхэ фае.

Зыщыдгъэгъупшэ хъущтэп, коронавирусым зиушъомбгъунымкIэ джыри щынагъо зэрэщыIэр, ащ хэхьэ вирусым иштаммыкIэу къежьагъэхэри. Специалистхэм зэралъытэрэмкIэ, мыщ пэуцужьын зылъэкIыщтыр вакцинациер ары. Ар республикэм щыпсэухэрэм къа­гурыIоным ыкIи врачхэм къаIорэм диштэу вакцинэр зыхарагъэлъхьаным мэхьанэшхо иI. Вакцинэм шIуагъэу къытырэр агъэунэфыгъ. Зыхалъхьагъэхэм япсауныгъэкIэ лъэшэу гумэкIыгъо хидзагъэхэу, къяхьылъэкIыгъэу хъугъэ-шIагъэ агъэунэфыгъэ­гоп. Арышъ, медикхэр цIыфхэм къяджэх вакцинациер акIунэу.

Ар зыщакIун алъэкIыщт чIыпIэ 32-рэ Адыгеим къыщызэIуа­хыгъ. Иммунизацием къыхиубытэрэр нахьыбэ шIыгъэным фэшI мобильнэ пунктхэм Iоф ашIэнэу рагъэжьагъ. Мэлылъфэгъум и 15-м ехъулIэу къызэратыгъэмкIэ, Адыгеим вакцинацием иапэрэ уцугъо нэбгырэ 17720-мэ акIугъ, зэрэпсаоу зыхалъхьагъэр – 12095-рэ. Мыщ ыпкIэ хэлъэу щытэп. ШIоигъоныгъэ зиIэ пстэуми афикъун хэлъхьагъу пчъагъэ щыI. Тхьамафэ къэс ар республикэм къыIэкIахьэ.

Шъугу къэдгъэкIыжьын, COVID-19-м пэуцужьырэ прививкэр зыщахалъхьэрэ чIыпIи 5-у Мыекъуапэ къыщызэIуахыгъэхэм мафэ къэс Iоф ашIэ.

Ахэр зыдэщытхэр:

1. къ. Мыекъуапэ, ур. Комсомольскэр, 159. 2. къ. Мыекъуапэ, Чкаловым иур., 77. 3. къ. Мыекъуапэ, я 7-рэ переулкэр, 16. 4. къ. Мыекъуапэ, Жуковскэм иур., 18. 5. ст. Ханскэр, Верещагиным иур., 111.

Прививкэр язгъэшIы мыхъущтхэр:

— пэтхъу-Iутхъур къызэузыгъэхэр;

— илъэс 18 мыхъугъэхэр;

— вакцинэм хэлъхэр къызэмыкIухэрэр.

Антителахэр иIэмэ цIыфым ыуплъэкIун ищыкIагъэп. Коронавирусыр къызэузыгъэхэм мэзи 6 зытешIэкIэ прививкэр арагъэшIы хъущт.

Вакцинэу «Спутник V» зыфиIорэр мэфэ 21-рэ азыфагоу едзыгъуитIоу ахалъхьэ. А шапхъэм шIокI иIэп. Сыда пIомэ иммунитетыр пытэщтэп.