ЦIыфхэм арагъэгъотырэ медицинэ IэпыIэгъур ыкIи фэIо-фашIэхэр Iэрыфэгъу шIыгъэнхэм нахь зыкъегъэIэтыгъэным фэIорышIэрэ Iофтхьабзэу «Добро в село» зыфиIорэр республикэм щырагъэжьагъ.

Мэлылъфэгъум и 16-м псауныгъэм ыкIи медицинэ профилактикэмкIэ Адыгэ республикэ гупчэхэм яспециалистхэм волонтер-медикхэр ягъусэхэу псауныгъэм имэфэ дэкIыгъо Шэуджэн районым ит къутырэу Чернышовым щыпсэухэрэм афызэхащагъ.

Ар окIофэ пэшIорыгъэшъ IофшIэныр волонтерхэм чанэу зэшIуахыгъ. Псауныгъэм зэрар езыхырэ шIыкIэхэр щыгъэзыегъэнхэм фэгъэхьыгъэ тхыгъэхэр агощыгъэх, лъыдэкIуаер, ялъэгагъэ, яхьылъагъэ афашыгъэх, унагъохэр къакIухьагъэх. ШIоигъоныгъэ зиIэ пстэуми терапевтыр къызэрагъэплъын, лъыр атын, кардиовизорымкIэ уплъэ­кIунхэр ышIынхэ, психологым дэгущыIэн амал иIагъ.

А мафэм пстэумкIи нэбгырэ 44-мэ медицинэ уплъэкIунхэр афашIыгъэх. Ащ щыщэу 22-мэ лъыдэкIуаер къахагъэщыгъ, 17-мэ алъ хэлъ шъоущыгъур ыкIи холестириныр бэу агъэунэфыгъ, кардиологыр къызэрагъэплъынэу тхьапэр нэбгырэ 13-мэ къафыратхыкIыгъ. УплъэкIунхэм къякIолIагъэхэм ищыкIэгъэ Iэзэгъу­хэр афатхыгъэх.

КъыкIэлъыкIорэ дэкIыгъор мэлылъфэгъум и 23-м Теуцожь районым щызэхащэнэу волонтерхэм агъэнафэ. НэкIубгъор зыгъэхьазырыгъэр Iэшъынэ Сусан.