Адыгеим ыцIэкIэ сенаторэу, партиеу «Единэ Россием» хэтэу Хъопсэрыкъо Мурат Красногвардейскэ районым ипсэупIэхэм ащыщхэм ащыIагъ, лъэпкъ проектхэр ыкIи къэралыгъо программэхэр зэращагъэцакIэхэрэм нэIуасэ зыфишIыгъ.

Сенаторым муниципалитетым ипащэу Гъубжьэкъо Темуррэ районым инароднэ депутатхэм я Совет итхьаматэу Анна Выс­тавкинамрэ игъусэхэу селоу Большесидоровскэм, къуаджэхэу Джамбэчыйрэ Улапэрэ ащашIыгъэ ыкIи ащагъэцэкIэжьыгъэ культурэм и Унэхэм ащыIагъ.

Къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм къыдыхэ­лъытагъэу Большесидоровскэм дэт культурэм иучреждение игъэкIотыгъэ гъэцэкIэжьынхэр рашIылIагъэх. IофшIэнхэм сомэ миллион 20,7-рэ апэIухьагъ.

Мы программэ дэдэм ишIуа­гъэкIэ къуаджэу Джамбэчые дэт культурэм и Унэ гъэцэкIэ­жьынхэр рашIылIагъэх. Проектым игъэцэкIэн сомэ миллион 14,4-рэ тефэщт. Учреждениер зызэтырагъэпсыхьэрэм ыуж творческэ объединение 12-мэ яIофшIэн рагъэжьэжьыщт. Ахэм адыгабзэкIэ спектакльхэр агъэуцух, лъэпкъ къашъохэр къашIых.

Адыгэ культурэр къэухъумэгъэным мэхьанэшхо раты Улапэ дэт культурэм и Унэ иIофышIэхэми. ЫпэкIэ къоджэ еджапIэм иактовэ зал ахэм агъэфедэщтыгъэ. Къэралыгъо программэм ишIуагъэкIэ культурэм иучреждениякIэ ишIын пэIухьащт сомэ миллион 46,7-рэ къафатIупщыгъ. Непэрэ мафэхэм ехъулIэу псэолъэшI IофшIэнхэр ыкIэм фэкIуагъэх.

Программэу «Гъэсэныгъэм хэхъоныгъэ ышIыныр» зыфиIорэр псэупIэу Большесидоровскэм игурыт еджапIэу N 8-м щыгъэцэкIагъэ зэрэхъугъэм сенаторым зыщигъэгъозагъ. Шъугу къэдгъэкIыжьын, 2019-рэ илъэсым мыщ игъэкIотыгъэ гъэцэкIэжьынхэр рашIылIагъэх, ащ сомэ миллион 15,5-рэ пэIуа­гъэхьагъ. Джащ фэдэу гъэсэныгъэм иучреждение компьютер­хэр къыфащэфыгъэх, испортзал зэтырагъэпсыхьагъ.

Джамбэчые къыщызэIуахыгъэ кIэлэцIыкIу джэгупIэ площадкэмрэ футбол цIыкIум тегъэ­псыхьэгъэ ешIапIэмрэ Хъопсэрыкъо Мурат зэригъэлъэгъугъэх. Сенаторым ежь имылъкукIэ мыщ фэдэ площадки 4 муниципалитетым щаригъэшIыгъ.

— Къуаджэм хэхъоныгъэ ышIыным, социальнэ ыкIи инженернэ инфраструктурэр щы­гъэпсыгъэным, цIыфхэм, анахьэу кIэлэцIыкIухэм ыкIи ныбжьыкIэхэм, Iэрыфэгъу щыIакIэ яIэным къэралыгъом ыкIи республикэм ипащэхэм мэхьанэшхо раты. ЦIыфхэм гумэкIы­гъоу, щыкIагъэу яIэхэр къыдэлъытэгъэнхэр, ахэм IэпыIэгъу афэ­хъу­гъэныр пшъэ­рылъ шъхьаI. Лъэпкъ проект­хэм яшIуагъэкIэ непэ къуа­джэм зэхъокIыныгъэшIухэр зэрэфэхъухэрэр тинэ­ры­лъэгъу. А Iоф­шIэныр тапэкIи лъы­гъэкIотэгъэным мэхьанэшхо иI, — къы­Iуагъ Хъопсэрыкъо Мурат.

Адыгеим и ЛIышъхьэ ипресс-къулыкъу.