Апэрэ дзэ дэщыгъор гъогу техьагъ
Гъэтхэ дзэ дэщыгъом къыдыхэлъытагъэу Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм яапэрэ куп мэлылъфэгъум и 15-м гъогу техьагъ. КъулыкъушIэ нэбгыри 10-р мэфэкI шIыкIэм тетэу агъэкIотагъэх.
Iофтхьабзэу АР-м идзэ комиссариат щыкIуагъэм хэлэжьагъэх Къыблэ дзэ округым изэхэт стратегическэ командование иинспектор куп хэтэу, генерал-майорэу Юрий Колягиныр, Адыгэ Республикэм и ЛIышъхьэ ихэушъхьафыкIыгъэ программэхэмкIэ гъэIорышIапIэм иупчIэжьэгъу шъхьаIэу Алексей Севцовыр, Мыекъопэ къэлэ администрацием ипащэ игуадзэу Андрей Пономаревыр, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
АР-м идзэ комиссариат иотдел ипащэу Алексей Санташовым пэублэ псалъэ къышIызэ, къэзэрэугъоигъэхэм шIуфэс къарихыгъ. Гъэтхэ дзэ дэщы-гъом иапэрэ куп я 150-рэ щэрыон дивизиеу Новочеркасскэ дэтым зэрагъакIорэр ащ къыхигъэщыгъ. НыбжьыкIэхэм закъыфигъазэзэ, Адыгеим ращыгъэ дзэкIолIхэм къагъэукIытэжьхэу къызэрэхэмыкIыгъэр ыкIи ахэм афэдэу зэрифэшъуашэу, щытхъу хэлъэу тихэгъэгу къаухъумэнэу зэращыгугъыхэрэр къариIуагъ.
Джащ фэдэу ныбжьыкIэхэм закъыфэзгъэзагъэхэм ащыщ генерал-майорэу Юрий Колягиныр. Хэгъэгум ыпашъхьэкIэ пшъэдэкIыжьэу ахьырэр агъэцэкIэным игъо къызэрэсыгъэр ащ хигъэунэфыкIыгъ. Ащ дакIоу, дзэм къулыкъу щыпхьыныр щытхъу зыхэлъ пшъэдэкIыжьэу зэриIэр УФ-м игражданин зэхишIыкIын фаеу генерал-майорым ылъытагъ. Хъулъфыгъэм ишэн-зекIуакIэхэр дзэ къулыкъум псыхьагъэ зэрэщыхъухэрэр, мы мафэм къыщегъэжьагъэу ахэр зэрэдзэкIолIхэр къагурыIозэ, щытхъу хэлъэу япшъэрылъхэр зэшIуахынхэ зэрэфаер агуригъэIуагъ. Илъэсыр зэрэмыбэр, псынкIэу зэрэкIощтыр Ю. Колягиным ипсалъэ къыщыхигъэщыгъ, ау спортым иамалкIэ а уахътэм къыкIоцI япсауныгъэ агъэпытэн зэралъэкIыщтым анаIэ тыраригъэдзагъ. ХэшыпыкIыгъэ дзэхэм мыхэр зэрэхэфагъэхэр къагурыIозэ, якомандирхэм ядэIунхэу, зыфэсакъыжьынхэу, зэрэдэкIыгъэхэм фэдэу япсауныгъэ зэщымыкъоу ны-тыхэм къафагъэзэжьынэу къафэлъэIуагъ.
КъулыкъушIэ хъугъэхэм ацIэкIэ къэгущыIагъ Андрей Мадоян. Гъэсэпэтхыдэ гущыIэу нахьыжъхэм къараIуагъэхэр шъхьапэ зэрафэхъущтым ицыхьэ зэрэтелъыр ащ къыхигъэщыгъ. Щытхъу хэлъэу къулыкъур зэрахьыщтыр, къызэращыгугъыхэрэр къызэрагъэшъыпкъэжьыщтыр къэзэрэугъоигъэхэм къариIуагъ.
Мы мафэм дзэ къулыкъум ращэжьагъэхэм ахэт Къайтыкъо Ахьмэд. Ащ янэу Пщыжъ Зурет гущыIэгъу тыфэхъугъ.
— СикIэлэ закъо зыкIэрызгъэкIынышъ, илъэсрэ зэрэсымылъэгъущтыр къин дэдэ къысщэхъу, — ыгу зэхэхьагъэу къеIуатэ ащ. — Лъэпкъ гвардием илъэс пчъагъэ хъугъэ Iоф зыщысшIэрэр. Арышъ, дэгъоу къызгурэIо дзэм къулыкъу щыпхьыным мэхьанэшхо зэриIэр.
Шъугу къэдгъэкIыжьын, мэлылъфэгъум и 1-м гъэтхэ дзэ дэщыгъор республикэм щырагъэжьагъ, Адыгеим щыщ ныбжьыкIэ 540-рэ фэдизмэ къулыкъур ахьыщт. Хабзэ зэрэхъугъэу, ахэр чIыпIэ зэфэшъхьафхэм ащэщтых.
Гъогу техьэгъэ ныбжьыкIэхэм щытхъу хэлъэу къулыкъур къахьын, шIурэ дахэрэкIэ ягупсэхэм къафагъэзэжьынэу афэтэIо.
Iэшъынэ Сусан. Сурэтхэр Iэшъынэ Аслъан тырихыгъэх.