Iофыгъо хэхыгъэ те­гу­щыIэнхэмкIэ зэнэ­къо­къоу (дебаты) кIэлэеджакIохэм азы­фагу зэхащагъэр Андырхъое Хъусенэ ыцIэ зыхьырэ Адыгэ кIэлэегъэджэ колледжым щыкIуагъ.

Адыгеим икIэлэеджакIохэу я 9 — 10-рэ классхэм арысхэр мыщ хэлэжьагъэх ыкIи текIоныгъэ къыдэзыхыгъэхэр джы Приэльбрусьем щыкIощт кIэух зэнэ­къокъум тишъолъыр къыща­гъэлъэгъощт.

НыбжьыкIэхэм къаIорэр зэ­рэшъыпкъэр жюрим ышIошъ агъэхъуныр ары пшъэрылъ шъхьаIэу щытыгъэр. Зэрэзэнэ­къокъугъэхэр «Массовое потребление: двигатель прогресса или путь к катаст­рофе» зыфи­Iорэр ары. Яеплъы­кIэ «зэрэдырагъаштэрэр» е «зэрэдырамыгъаштэрэр» пхъэ­дзыкIэ къэнэфагъ. Тезис зэ­фэшъхьафхэр апэ къаIуагъэх, нэужым ахэмкIэ зэнэкъокъу­гъэх.

— Непэрэ Iофтхьабзэм къыщаIэтыгъэ темэм зэпымыоу егъашIэм урызэнэкъокъун плъэ­кIыщт. Мы Iофыгъом лъэныкъо зэфэшъхьафхэмкIэ кIэлэ­еджакIохэр къекIолIагъэх: эти­кэм, экологием, социологием, нэмыкIхэми. Еплъы­кIэ гъэшIэгъонхэр ныбжьыкIэхэм зэряIэм, акъылыгъэ хэлъэу, зыми фэмыдэ ямышIыкIэ гупшысэхэр къыз­хагъуатэзэ зэрэзэнэкъо­къугъэм лъэшэу тигъэгушIуагъ, — къы­Iуагъ проектым изэхэщакIоу Хачим Желигаштовым.

Жюрим хэтыгъэх АР-м гъэсэныгъэмрэ шIэныгъэмрэкIэ и Министерствэ кIэлэцIыкIухэм ыкIи ныбжьыкIэхэм япIун ылъэ­ныкъокIэ щыIэ къэралыгъо политикэр пхырыщыгъэнымкIэ и ГъэIорышIапIэ ипащэу Нэгъэ­рэкъо Алый, философие шIэныгъэхэмкIэ докторэу Шъаукъо Ас­фар, шъолъыр обществэу «Шыу Хасэ» зыфиIорэм ипащэу Тхьапшъэкъо Альберт, проектэу «Хэкум» ипащэу ЛIыхъукIэ Айдэмыр, журналистэу ГъукIэлI Сусан. КъаIуатэрэр зэрэтэрэзыр ашIошъ агъэхъун закъор арэп жюрим уасэ зыфишIыгъэр, гущыIэнхэмкIэ IэпэIэсэны­гъэу ахэлъыри къыдалъытагъ.

— Политикэм, диным, хъыз­мэтым алъэныкъокIэ лъэпкъхэр зэфэщагъэ зэрэхъухэрэм еджакIохэр атегущыIагъэх. Научнэ IофшIагъэхэр ыкIи нэмыкI тхылъхэр яIэпыIэгъоу упчIэхэм кIэкIэу, тэрэзэу джэуапхэр къаратыжьых. Хъугъэ-шIагъэхэр зыщыхъугъэ уахъ­тэр, чIыпIэр псынкIэу агу къэ­кIыжьы, — къыт­фиIотагъ Адыгэ республикэ гимназием икомандэ икIэща­кIоу, тарихъымкIэ кIэ­лэ­егъа­джэу Жанна Ененко.

Зэнэкъокъум икIэух къызэ­рэщынэфагъэмкIэ, Адыгеир къэзгъэлъэгъощтыр командитIу: «Знатоки» зыфиIорэр — Адыгэ республикэ гимназиеу N 1-р ыкIи «Агностики» зыфиIорэр — Мыекъопэ гимназиеу N 5-р.

Проектым изэхэщакIохэм къызэраIуагъэмкIэ, зэнэкъокъум ифинал Къэбэртэе-Бэлъкъар къэралыгъо университетым мэ­лылъфэгъум и 21 — 23-м щыкIощт. Республикэ пэпчъ икомандэ анахь дэгъуитIур ащ хэлэ­жьэщт. Soft-Skills лъэныкъомкIэ шIэныгъэу яIэм нэмыкIэу, пэ­рытныгъэмкIэ, культурнэ Iоф­тхьабзэхэмкIэ, нэмыкIхэмкIи финалым щызэнэкъокъущтых.

Проектыр пхырызыщырэр Къэбэртэе-Бэлъкъар Республи­кэм и Парламент дэжь щыIэ НыбжьыкIэ палатэр ары. Ащ иIэпыIэгъух КъБР-м просвещениемкIэ и Министерствэ, АР-м гъэсэныгъэмрэ шIэныгъэмрэкIэ и Министерствэ, Адыгэ Хасэр, обществэу «Черкесский Ренессанс», Президент грантхэм я Фонд.