ИкъэгъэлъэгъонхэмкIэ анахь дэгъухэм ащыщ
Адыгэ Республикэм и ЛIышъхьэу КъумпIыл Мурат УФ-м и УIэшыгъэ КIуачIэхэм я Генеральнэ штаб ия 2-рэ гъэIорышIэпIэ ШъхьаIэ ипащэу Владимир Цимлянскэм ыкIи Урысыем и Президент ихэушъхьафыкIыгъэ программэхэм игъэIорышIэпIэ ШъхьаIэ иупчIэжьэгъоу Николай Мартыновым тыгъуасэ IофшIэгъу зэIукIэгъу адириIагъ. Iофтхьабзэм хэлэжьагъэх Адыгеим идзэ комиссарэу Александр Аверинымрэ АР-м и ЛIышъхьэ ихэушъхьафыкIыгъэ программэхэм игъэIорышIапIэ ипащэу Владимир Шабалинымрэ.
Адыгеим и ЛIышъхьэ пэублэ псалъэ къышIызэ дзэ дэщыгъо кампанием республикэм сыдигъуи мэхьанэшхо зэрэщыратырэр, планэу къафагъэуцугъэр илъэс къэс зэрагъэцакIэрэр хигъэунэфыкIыгъ.
— БлэкIыгъэ тхьамафэм муниципалитетхэм япащэхэр, дзэ комиссариатым ыкIи хэбзэухъумэкIо къулыкъухэм ялIыкIохэр тигъусэхэу гъэтхэ дзэ дэщыгъом епхыгъэ гумэкIыгъохэм татегущыIагъ. Мы лъэныкъомкIэ IофшIэныр гъэлъэшыгъэным тегъэпсыхьэгъэ пшъэрылъхэр муниципальнэ образованиехэм, ведомствэхэм афэтшIыгъэх, — къыIуагъ КъумпIыл Мурат.
Дзэ къулыкъум изыфэгъэхьазырын епхыгъэ IофшIэныр анахь дэгъоу зэхэзыщэхэрэм якъыхэхынкIэ зэнэкъокъоу зэхащагъэм Адыгеим дэгъу дэдэу зыкъызэрэщигъэлъэгъуагъэр къаIуагъ. Къыблэ федеральнэ шъолъырым республикэм текIоныгъэр къыщыдихыгъ, цифрэ къэгъэлъэгъонэу иIэхэмкIэ Урысыем ящэнэрэ чIыпIэр щиIыгъ. ХагъэунэфыкIырэ чIыпIэу къыфагъэшъошагъэр къэгъэшъыпкъэжьыгъэным фэшI специалистхэм Iофтхьэбзэ гъэнэфагъэхэр республикэм щырагъэкIокIыщтых. Ащ фэдэ зэхэфын IофшIэнхэр Брянскэ, Омскэ, Архангельскэ хэкухэм ыкIи Хабаровскэ кра- им ащэкIох.
Адыгэ Республикэм и ЛIышъхьэ ипресс-къулыкъу