— Гупчэм цIыфхэм зэ­пхыныгъэ адыриIэу, зыщящыкIагъэм ежьхэми зыкъыфагъэзэн, къэбарыр «мыгъэкIэрэкIагъэу», зытетым тетэу къыIэкIагъэ­хьан амал щыIэн фае, — къыIуагъ УФ-м и Президентэу Владимир Пу­тиным УФ-м и Прави­тельствэ икоординационнэ Гупчэу агъэпсыгъэм зыщэIэм.

Федеральнэ министерствэхэмрэ ведомствэ­хэмрэ шъолъырхэм зэпхыныгъэ адыряIэным, Президентыр, Правительствэр кIэщакIо зыфэ­хъугъэ проектхэм, пшъэ­рылъхэм ягъэцэкIэнкIэ IэпыIэгъу аратыным пае ар къызэ­Iуахыгъ. ЦIыф­хэмрэ хэбзэ къулыкъу­хэмрэ занкIэу зэпхыныгъэ зэдыряIэн алъэкIынэу шIыгъэ­ныри Гупчэм ипшъэрылъ шъхьаIэхэм ащыщ.

— Шъолъырхэм яIофыгъохэр, цIыфхэр зы­гъэгумэкIыхэрэр е хъугъэ­-шIагъэ горэ щыIэмэ ащ епхыгъэ къэбарыр зыпари хэмызыгъэу, зытетым тетэу зищыкIэгъэ къулыкъухэм къаIэкIэ­хьанышъ Iоф дашIэн, IэпыIэгъу аратыным пае шъолъырхэм Гупчэм зан­кIэу зы­къыфагъэзэн алъэ­кIынэу шIыгъэн фае, — къыIуагъ Владимир Пу­тиным.

УФ-м и Президент и Джэпсалъэ къыпкъырыкIыхэзэ, цIыфхэм ящыIакIэ нахьышIу шIыгъэным фытегъэпсыхьэгъэ пшъэ­рылъ гъэнэфагъэхэр министрэхэм я Кабинет зы­­фишIыжьыгъэх. УФ-м и Правительствэ и Тхьама­тэу Михаил Мишустиным анахь шъхьаIэу яIофшIэн зыфэгъэзагъэхэм къатегущыIэзэ, Iофэу ашIэрэм цIыфхэм шIуагъэ къызэрафихьырэр нэрылъэгъуным анахь мэхьанэшхо зэриIэр къыIуагъ. Унагъо­хэмрэ кIэлэцIыкIухэмрэ афагъэнэфэгъэ ахъщэ тынхэр ны-тыхэм лъэIу тхылъхэр атынхэ имыщыкIагъэу, Iофыбэ къы­пы­мыкIыжьэу афатIупщы зэрэхъугъэр зы щысэу Премьер-министрэм къы­хьыгъ.

Владимир Путиным илъэсэу тызыхэтым иIоныгъо и 1-м шIомыкIэу кIэлэеджакIохэм шхын стыр аIэкIэгъэхьэгъэным ылъэныкъокIэ Iофыгъоу еджапIэхэм яIагъэхэр да­гъэзыжьынхэу зэращыгугъыхэрэр къыIуагъ.

— Мы уахътэм шъо­лъырхэм ар зэращагъэцакIэрэм узымыгъэрэзэныбэ хэлъ. Роспотребнадзорым джыри еджапIэхэр ыуплъэкIужьынхэ фае. Арэу щытми, 2021-рэ илъэсым иIоныгъо мазэ къэмысызэ, зэкIэми а IофшIэныр ифэшъуашэм тетэу зэтырагъэуцонэу тэ­­гугъэ, — къыIуагъ къэралыгъом ипащэ.