Адыгэ Республикэм и ЛIышъхьэ иунашъокIэ медицинэ организа­цие­­хэм пэшIорыгъэшъ Iофтхьабзэхэмрэ диспансеризациемрэ яшIын ащырагъэжьэжьыгъ. «Псауныгъ» зыфиIорэ лъэпкъ проектым къыдыхэ­лъытагъэу диспансеризациер рагъэкIокIы.

2021-рэ илъэсым республикэм ис нэбгырэ 77118-мэ диспансеризацие акIун фае. Зыныбжь илъэс 18-м къыще­гъэжьагъэу 39-м нэсхэм илъэ­сищым къыкIоцI зэ, илъэс 40-м къехъугъэмэ илъэс къэс диспансеризацие арагъэкIу. 2021-рэ илъэсым 1982-рэ, 1985-рэ, 1988-рэ, 1991-рэ, 1994-рэ, 1997-рэ, 2000-рэ, 2003-рэ илъэсхэм къэхъугъэхэм ар акIун фае.

Диспансеризацием икIун пкIэ хэлъэп, шIокI зимыIэ медицинэ страхованием ылъэныкъокIэ Iофтхьабзэр агъэцакIэ. Диспансеризацие акIуным фэшI участковэ врач-терапевтым екIо­лIэнхэ фае.

Iоф зышIэхэрэр илъэсищым къыкIоцI зы мафэрэ IофшIэным зыкъарагъэтIупщын фитыныгъэ яI. Пенсием щыIэхэм ыкIи ащ фэдэ ныбжь зиIэхэу Iоф зышIэхэрэм илъэс къэс мэфитIу къаратын фае.

— Диспансеризациер цIыфхэм уз хьылъэхэр къямыутэ­кIынхэм, пкъышъолыр псыхьэгъэным афэIорышIэ. Узыр нахь псынкIэу къыхэгъэщыгъэным ар тегъэпсыхьагъ, — къыщаIуагъ Адыгэ Республикэм псауныгъэр къэухъумэгъэнымкIэ и Минис­терствэ.

Абрэдж Сэтэнай.