Сымэджэщыр къызэIуахыжьыгъ
Коронавирусыр къызпыхьагъэхэм зыщяIазэхэрэ зы госпиталь Адыгеим джырэ уахътэ ит. Мы мафэхэм Инэм сымэджэщым хирургиемкIэ икорпус къызэIуахыжьыгъ.
Ар блэкIыгъэ илъэсым пандемием илъэхъан инфекционнэ госпиталь ашIыгъагъ.
IофшIэныр ригъэжьэжьыным ыпэкIэ сымэджэщым гъэцэкIэжьынхэр рашIылIагъэх, аужырэ шапхъэхэм адиштэрэ медицинэ оборудование зэрагъэгъотыгъ, мебель къащэфыгъ.
— «Клиника 21 века» зыфиIорэм игенеральнэ пащэу Жанэ Аскэр тызэрэфэразэр къыхэдгъэщы тшIоигъу. Ар гъэцэкIэнхэр зэрэкIорэм лъыплъагъ. Джащ фэдэу Шъэумэн Хьазрэт ишIогъэшхо къытигъэкIыгъ. Ащ сымэджэщым чIагъэуцощт оборудованиемрэ мебелымрэ къызэращэфыщт ахъщэр къаритыгъ, — къыщаIуагъ АР-м псауныгъэр къэухъумэгъэнымкIэ и Министерствэ.
Джырэ уахътэ сабый зышъо хэлъ ыкIи къызфэхъущт бзылъфыгъэхэм медицинэ IэпыIэгъу арагъэгъотыным сымэджэщыр фытегъэпсыхьагъ. Бзылъфыгъэхэм зыщалъыплъэхэрэ ыкIи упчIэжьэгъу зыщафэхъухэрэ чIыпIэмрэ сабый къызщагъэхъурэ отделениемрэ къызэIуахыгъэх. Инэм щыпсэухэрэм медицинэ IэпыIэгъу зэрагъэгъотыным фэшI зыгорэм кIонхэ ищыкIагъэп. Абрэдж Сэтэнай.