Фэтэр е унэе унэ пэпчъ газ плитар, колонкэу псыр къэзгъэфа­бэ­рэр, котелыр арытых. Ахэр зэкIэ унэ кIоцIхэм арыт газ обору­до­ванием къыхеубытэх. «Гъэстыныпхъэ шхъуантIэр» зэрэIэрыфэгъум тесэжьыгъэшъ, газыр гумэкIыгъо-щынагъом икъэкIуапIэу зэрэ­щы­тыр тщыгъупшэу къыхэкIы. Ау зэкIэми типшъэрылъ ащ ты­фэса­къыныр. — Газ оборудованием изытеткIэ хэта пшъэ­дэкIыжь зыхьырэр?

— Хэбзэгъэуцугъэу щыIэм нафэу къыщеIо: техникэм ылъэ­ныкъокIэ газ оборудованием изытет зыфэдэмкIэ пшъэдэкIыжь зыхьырэр абонентыр ары. Илъэс къэс зэ нэмыIэми ащ изытет ауплъэкIун фае.

— Техническэ фэIо-фа­шIэхэм япхыгъэ зэзэгъыныгъэр сыда зэрищыкIагъэр?

— Урысые Федерацием ихэ­бзэгъэуцугъэ ар къыделъытэ, Урысые Федерацием и Пра­вительствэ иунашъоу N 410-р зытетым къызэриIорэмкIэ, або­нент пэпчъ организацие гъэ­нэфагъэм зэзэгъыныгъэ игъом дишIын фае техническэ фэIо-фашIэхэмрэ гъэцэкIэжьын Iоф­шIэнхэмрэ япхыгъэу. Ащ фэдэ зэзэгъыныгъэр щымыIэ зыхъу­кIэ, ар зипшъэрылъым имыза­къоу, нэмыкI цIыфхэу къэзыуцухьэхэрэри щынэгъо чIыпIэ ифэнхэ алъэкIыщт.

— Зэзэгъыныгъэр щыз­гъэзыерэм сыдэущтэу дэ­зекIохэра?

— Газыр аIэкIэзгъахьэрэм фитыныгъэ иI, абонентым газыпкIэр зэкIэ икъоу ытыгъэми, газыр пиупкIынэу.

— Сыд фэдиза тазырэу тыралъхьэрэр зэзэ­гъыныгъэ адэзымышIыгъэм?

— Зэзэгъыныгъэр щызгъэ­зыягъэм иIоф Жилинспекцием IэкIагъахьэ, ащ тазырыр зыфэдизыр къыретхыкIы. Газыр щынэгъончъэу щытынымкIэ шапхъэхэр зыукъохэрэм апае 2016-рэ илъэсым тыгъэгъазэм и 16-м къыщегъэжьагъэу тазырхэр зыфэдизыщтхэр агъэнэфагъэх. ГущыIэм пае, организацием илIыкIо уплъэкIунхэм апае унэм изымыгъахьэхэрэм сомэ миным къыщегъэжьагъэу минитIум нэс рагъэтын алъэкIыщт, IэнатIэхэр зиIэхэм – сомэ мини 5 — 20 фэдиз, юридическэхэм — сомэ мин 40 — 100-м нахь мэкIэщтэп. Ау аварие горэ ахэм ялажьэкIэ къэхъумэ, тазырхэу зигугъу къэтшIыгъэхэм ахэхъо: цIыфхэм — сомэ мини 10 — 30, IэнатIэхэр зиIэхэм — сомэ мин 50

— 100, юридическэхэм —сомэ мини 100 — 400 атыщт.

— Сыд фэдиза ахъщэу атефэрэр техническэ фэIо-фашIэхэм?

— Ащ фэдэ зэзэгъыныгъэ­хэмкIэ фэIо-фашIэхэм атефэрэр зэфэшъхьафэу щыт. Ар зэлъытыгъэр фэтэрым ит оборудо­ваниер зыфэдэр ары.

ГущыIэм пае, газ хьакоу (пщэрыхьапIэу) унэм итыр конфоркиплI хъу зыхъукIэ, илъэсым телъы­тэгъэ фэIо-фашIэхэм япхыгъэ зэзэгъыныгъэм тефэщтыр сомэ 456-рэ, псыр къэзгъэфэбэрэ емкостым — сомэ 545-рэ. Нахь игъэкIотыгъэу къэбарыр разделэу «Газ для потребителя» зыфиIорэм (сайтэу adyggaz.ru.) ижъугъотэщт.

— Сыд фэдэ фэIо­-фа­шIэ­ха техническэ фэIо-фашIэхэм ауасэ хахьэхэрэр?

— Сыд фэдэрэ техническэ фэIо-фашIи пшъэрылъ шъхьаIэу иIэр механизмэхэмрэ газым епхыгъэ пкъыгъохэмрэ ятехническэ зытет тэрэзыным ынаIэ тыригъэтыныр, ащ лъыплъэныр ары. А Iофым фэгъэзэгъэ цIыфыр къызыкIокIэ, газ оборудованием хэлъын фэе пкъыгъохэр екъужьхэмэ еуплъэ­кIу, газыр къыдэкIымэ, къэп­IонтIэн фэе чIыпIэхэр зэщы­къуагъэхэмэ, щыфэ ящыкIа­гъэмэ, тэрэзэу газыр маблэмэ зэрегъашIэ. Iугъор зэрикIырэ ыкIи жьыр къызэрихьэрэ чIыпIэхэм язытет еуплъэкIу. ЗыгорэкIэ пкъыгъо горэхэр зэ­блэхъугъэнхэ е гъэцэкIэжьы­гъэнхэ фаеу хъумэ, ахэм ате­фэрэ ахъщэр шъхьафэу або­нентым еты.

— Техническэ фэIофа­шIэхэр тхьапшрэ пшIын­хэу щыта?

— Хэбзэгъэуцугъэу щыIэм къызэрэдилъытэрэмкIэ, илъэс къэс ахэр зэ пшIынхэ фае. Ежь унэр зиехэри газ Iэмэ-псымэхэм афэсакъынхэ, щынэгъон­чъэу ахэр щытынхэмкIэ япшъэ­рылъхэр агъэцэкIэнхэ фае.

— Сыда джыдэдэм ащ фэдэ фэIо-фашIэхэр бгъэ­цэкIэнхэр нахь тэ­рэзэу, нахь къекIоу зыкIалъытэрэр?

— Унэхэм ягъэплъын зы­щаухырэ пIалъэр къэблагъэ, газым епхыгъэ пкъыгъохэр нахь макIэу агъэфедэхэ хъугъэ. ГумэкIыгъохэр къэкIорэ гъэ­фэбэгъу пIалъэм къэмыхъунхэм пае джырэ уахътэм гъэцэкIэжьын Iоф горэхэр ящы­кIагъэхэмэ гъэунэфыгъэн ыкIи ахэр зэшIохыгъэнхэ фае.

Техническэ фэIо-фашIэхэмрэ гъэцэкIэжьынхэмрэ афэгъэхьыгъэ зэзэгъыныгъэм иIофыгъо­хэмкIэ телефонэу 52-37-00-м шъутеу е электрон адресымкIэ (ЕО@adyggaz.ru) зафэжъугъаз.

Олеся Панова.

Iахьзэхэлъ обществэу «Газ­пром газораспределение Майкоп» зыфиIорэм иге­неральнэ директор иупчIэ­жьэгъу.