Ныдэлъфыбзэм и Дунэе мафэ фэ­гъэхьыгъэ къэлэ фестивалым изэфэхьысыжьхэр къэнэфагъэх. Гурыт еджа­пIэхэм ащеджэрэ кIэлэ­еджакIо­хэм сэнаущыгъэу ахэлъыр ащ къыща­гъэлъэгъуагъ.

А 1-рэ классым къыщегъэжьагъэу я 11-м нэс арыс кIэлэеджэкIо 17 ащ хэлэжьагъ. Хабзэ зэрэ­хъугъэ Iофтхьабзэр гурыт еджапIэу N 28-м щы­кIуагъ.

Мыекъопэ къэлэ ад­министрацием гъэсэны­гъэмкIэ и Комитет къызэрэщаIуагъэмкIэ, лъэ­ныкъо зэфэшъхьафхэмкIэ ныбжьыкIэхэм зыкъагъэлъэгъуагъ. Орэд къэIонымкIэ, усэ къеджэнымкIэ заушэтыгъ, джащ фэ­дэу ныдэлъфыбзэм икъэу­хъумэнкIэ плакатэу ашIыгъэхэр къырахьылIагъэх. Адыгэ Республикэм щы­псэурэ лъэпкъ зэфэшъхьафхэм яныдэлъфыбзэ ибаиныгъэ къагъэлъэ­гъуагъ.

Анахь IофшIэгъэ гъэшIэгъонхэр къезыхьылIагъэу къыхахыгъэхэр Дарина Высокозерскаямрэ Снежана Лейнвеберрэ. Орэд къэIонымкIэ апэрэ чIыпIэр къыдэзыхыгъэр Саад Мариам. Ежь-ежьырэу зэхигъэуцогъэ усэм анахь дэгъоу къеджагъэр Къуижъ Самира.

ТекIоныгъэ къыдэзыхыгъэхэр Мыекъопэ къэлэ администрацием къыра­гъэблэгъагъэх. ГъэсэныгъэмкIэ Комитетым ипащэу Ольга Романенкэр анахь дэгъоу къыхахы­гъэхэм къафэгушIуагъ, та­пэкIи гъэхъэгъэшIухэр ашIынхэу къафэлъэIуагъ.

КъыткIэхъухьэрэ лIэуж­хэм яныдэлъфыбзэ ашIэныр, ар агъэлъэпIэныр, нэмыкI лъэпкъхэм шъхьэ­кIафэ афашIыныр, ахэм якультурэ ашIэныр ыкIи сэнаущыгъэ зыхэлъ ныбжьыкIэхэр къыхэгъэщы­гъэныр ары зэхэщакIохэм пшъэрылъ шъхьаIэу зыфагъэуцужьырэр.

ДЕЛЭКЪО Анет.