Тэхъутэмыкъое районым ия 4-рэ спорт еджа­пIэу «Ша­псыгъэм» зыщызыгъэсэрэ ныб­­жьыкIэхэр хэгъэгу зэнэкъо­къу­хэм ахэлажьэх, щыт­хъуцIэхэр къащыдахы.

Къыблэ шъолъырым самбэмкIэ изэIукIэгъухэу Новороссийскэ щыкIуагъэхэм 2005 — 2007-рэ илъэсхэм къэхъугъэ кIалэхэм яIэпэIэсэныгъэ къыщагъэлъэгъуагъ. Мамхыгъ Астемир, кг 88-рэ, апэрэ чIыпIэр ­къыдихи, дышъэр къыфагъэшъошагъ. Урысыем икIэух зэнэкъокъу хэлэжьэнэу зегъэхьа­зыры. Тренерэу Ацумыжъ Заур нарт шъаор егъасэ.

— Мамхыгъ Астемир Пэнэхэс гурыт еджа­пIэм ия 9-рэ класс щеджэ, — къытиIуагъ ныбжьыкIэхэм Iоф адэзышIэрэ тренерэу Ацумыжъ Заур. — Тэхъутэмыкъое гурыт еджапIэу N 1-м щеджэрэ Хьадпэшъо Дамир, кг 53-рэ, ятIонэрэ чIыпIэр Ново­российскэ къыщыдихыгъ, тренерыр Нэгъой Ибрахьим.

Спорт еджапIэу «Шапсыгъэм» ипащэу Нащ Шыхьам дзюдом, самбэм щашIэ. Хэгъэгу, дунэе зэIукIэгъухэм хагъэунэфыкIырэ чIыпIэхэр къащыдихызэ, Адыгэ Респуб­ликэм ыцIэ спортышхом щигъэIугъ.

«Шапсыгъэм» щагъэсэрэ ныбжьыкIэхэм лъэпкъ шэн-хабзэхэр, тарихъыр зэрагъашIэ. Зэнэкъокъухэм адыгэ быракъыр ащагъэбыбатэ, республикэ быракъым чIэтыхэу нэпэеплъ сурэтхэр атырахых.

— Мэлылъфэгъум и 25-м адыгэ быракъым и Мафэ хэдгъэунэфыкIыщт. МэфэкI зэхахьэм тиеджакIохэр хэлэжьэщтых, — къеIуатэ Ацумыжъ Заур. — МэфэкIым ­лъэпкъ зэфэшъхьафхэр щызэIукIэщтых, спорт зэ­нэ­къокъухэр гъэшIэгъон хъущтхэу тэлъытэ.