Лъэпкъ проектэу «Демографием» ишъолъыр проектэу «Сабый къызэрыхъухьэгъэ унагъохэм мылъку IэпыIэгъу ягъэгъотыгъэныр» зыфиIорэм игъэцэкIэн къыдыхэлъытагъэу 2018-рэ илъэсым къыщегъэжьагъэу апэрэ сабый къызфэ­хъугъэхэм мазэ къэс ахъщэ тын къафэкIо.

2020-рэ илъэсым щегъэжьагъэу мыщ шапхъэу пылъхэр зэрэзэблахъугъэхэм къыхэкIыкIэ ахъщэр къызIэкIэхьащтхэм япчъагъэ нахьыбэ хъугъэ ыкIи сабыир илъэсищ хъуфэ аратынэу агъэнэфагъ. Программэр загъэцакIэрэм щыублагъэу республикэм ис унэгъо 3479-мэ мы IэпыIэгъур къаIукIагъ, ахэм ащыщэу мы илъэсым къыхэхъуагъэр унэгъо 252-рэ. Илъэсыр къызихьагъэм къыщегъэжьагъэу кIэлэцIыкIу 930-рэ Адыгеим къыщыхъугъ, ахэм ащыщэу 289-р апэрэ сабыих.

Унагъом исым телъытагъэу гурытымкIэ хахъор сомэ 20808-м шIомыкIымэ, 2018-рэ илъэсым щылэ мазэм и 1-м ыуж апэрэ сабый къызэрыхъухьагъэхэм мазэ къэс сомэ мини 10060-рэ араты.

— Апэрэ сабый къызфэхъугъэхэм (е зыпIунэу зыштагъэхэм) ахъщэ IэпыIэгъур къаратыным фэшI илъэсищым къыкIоцI тхьапэхэр къытахьылIэн фае. Ау апэрэ сабыир къызыхъугъэм ыуж мэзих нахьыбэ тебгъашIэ хъущтэп, джащыгъум тхьапэхэм тахэплъэщт. АдрэхэмкIэ ны-тыхэм зыкъызщытфагъэзэгъэ мафэм щегъэжьагъэу мазэм телъытэгъэ тыныр къафэкIо, — еIо АР-м IофшIэнымрэ социальнэ хэхъоныгъэмрэкIэ и Министерствэ бзылъфыгъэхэм ыкIи кIэлэцIыкIухэм яIофыгъохэмкIэ иотдел ипащэу Саида Стрикачевам.

Ахъщэр къаратыным пае псэупIэу зыдэсхэм елъытыгъэу IофшIэнымкIэ ыкIи социальнэ хэхъоныгъэмкIэ гупчэм е МФЦ-м екIолIэнхэ фае. ДЕЛЭКЪО Анет.