2021-рэ илъэсым мэлылъфэгъум къыщегъэжьагъэу мэкъуогъум нэс республикэм дзэ дэщыгъо кампаниер зэрэщыкIощытым фэгъэхьы­гъэ брифинг Адыгеим идзэ комиссариат джырэблагъэ зэхищагъ.

Ащ хэлэжьагъэх дзэ комиссариатым ипащэу Александр Авериныр, кIалэхэм ядэщынкIэ ыкIи ягъэхьазырынкIэ отделым ипащэу Алексей Санташовыр, дзэ-врачебнэ комиссием ипащэу Руслан Мамаевыр, район дзэ комиссариатхэм япащэхэр, рес­публикэм икъэбарлъыгъэIэс амалхэм ялIыкIохэр.

Федеральнэ хэбзэгъэуцугъэу «О воинской обязанности и военной службе» зыфиIорэм къызэрэщиIорэмкIэ, дзэм къулыкъур щызыхьын зылъэкIыщтхэр илъэс 18-м къыщегъэжьагъэу илъэс 27-м нэс зыныбжь хъулъфыгъэхэу дзэ учетым хэт­хэр ыкIи хэмытхэр арых. Федеральнэ хэбзэгъэуцугъэм къызэригъэнафэу, къулыкъур амыхьын фитхэу шъхьафит ашIыгъэхэр, джащ фэдэу отсрочкэ зиIэхэр ыкIи ипсауныгъэкIэ къулыкъур зыхьын зымылъэкIыщтхэр дзэм ащэщтхэп. КIалэр илъэс 18 зыхъукIэ ары ныIэп дзэм къеджэнхэ залъэкIыщтыр.

Гъэтхэ дзэ дэщыгъор тирес­публикэ зэрэщызэхащэрэм ехьылIагъэу къэгущыIэгъэ Александр Авериным къызэриIуа­гъэмкIэ, республикэм щыщ нэ­бгырэ 3000-м ехъу къулы-къур ахьыным къыхеубытэ. Пла­нэу къафагъэуцугъэм тетэу яIофшIэн зэхащэ. Къыблэ дзэ шъолъырым икомандующэ иуна­шъокIэ УФ-м идзэ къулыкъу хахьэхэрэ лъэсыдзэхэм, мэшIокудзэхэм, ошъогу десанты­дзэхэм, стратегическэ мэхьанэ зиIэ ракетыдзэхэм, хыдзэ флотым ыкIи Урысые Феде­рацием и Лъэпкъ гвардие идзэ­хэм нэбгырэ 550-м ехъумэ къулыкъур ащахьынэу агъэнэфагъ. Ахэр зипкъышъолкIэ анахь пытэхэр арых. Темыр Кавказым къыхиубытэрэ чIыпIэхэр ары нахьыбэу тиныбжьыкIэхэм къулыкъур зыщахьыщтыр. Ащ кIо зышIомыигъо ныбжьыкIабэ загъэбылъэу, комиссариатхэм къямыкIуалIэхэу къыхэкIы. Мы мафэм ехъулIэу нэбгырэ 20-м ехъур военкоматым къекIо­лIагъэхэп, ахэм алъэхъух. АР-м хэгъэгу кIоцI IофхэмкIэ и Министерствэ ыкIи кощын Iоф­хэмкIэ отделым дзэ комис­сариатым зэпхыныгъэ дэгъу дыряIэу зэрэзэдэлажьэхэрэм ишIуа­гъэкIэ дзэ къулыкъум зы­щызыдзыехэрэр къыхагъэщых.

— Дзэ дэщыгъор военко­ма­тым иIофшIэн изы пшIанэу щыт, ау анахь шъхьаIэхэм ащыщ. Къулыкъур ахьынэу къыз­тефэ­хэрэм яфизическэ ухьазыр­ныгъэрэ япсауныгъэ изытетрэ лъэшэу анаIэ тырагъэты комиссием хэтхэм. БлэкIыгъэ илъэсым зэхащэгъэгъэ бжыхьэ дзэ дэщыгъом аныбжьыкIэ къулыкъу ахьынэу къызытефэрэ нэбгырэ мини 2,5-м ехъу чIыпIэ комиссариатхэм къякIолIагъэх, ахэм япроцент 29,7-мэ япсауныгъэ изытеткIэ къулыкъум ащагъэхэп. Анахьэу къупшъхьэ-лъынтфэ уз зиIэхэу, зипсихикэ зэ­щыкъуагъэхэу, кIэтIый уз зиIэхэу къыхагъэщыгъэр бэ, — къы­Iуагъ А. Авериным.

Дзэ-врачебнэ комиссием ипащэу Руслан Мамаевым къы­зэриIуагъэмкIэ, ар анахьыбэ­рэмкIэ зэлъытыгъэу агъэунэ­фыгъэр унагъоу къызэрыхъу­хьагъэр ыкIи шъхьадж ипсауныгъэ зэрэлъыплъэрэ шIыкIэр арых. Ащ къыхэкIэу УФ-м зыу­хъумэжьынымкIэ и Министерствэрэ УФ-м псауныгъэр къэухъумэгъэнымкIэ и Министерствэрэ унашъо зэрэзэдашIыгъэм тетэу илъэс 15-м къыщегъэжьагъэу зипсауныгъэкIэ узлъыплъэнэу щыт кIэлэцIыкIу­хэм тисымэджэщхэр адэлажьэх.

Дзэ комиссариатым иIофышIэхэм зэрагъэунэфыгъэмкIэ, дзэ къулыкъум зыщызы­дзыехэрэм япчъагъэ мыгъэ нахь макIэ хъугъэ. ИкIыгъэ илъэсым ибжыхьэ нэбгырэ 510-рэ дзэ къулыкъум ащагъ. Ахэм ащыщэу 53-мэ дзэ-учетнэ сэнэхьат зэрагъэгъотыгъ, 69-мэ апшъэрэ гъэсэныгъэ яI, процент 77-мэ дзэ къулыкъу шIэнынэгъэхэр республикэм ит гъэсэныгъэм иучреждениехэм ащарагъэгъотыгъ.

АР-м и ЛIышъхьэ иунашъокIэ пандемием илъэхъан цIыф­хэр нахь макIэу зэхагъэхьанхэм фэшI муниципальнэ об­разованиехэм ащыIэ дзэ ко­миссиехэм яIофшIэн 2021-рэ илъэсым мэлылъфэгъум и 1-м рагъэжьагъ.

Дзэ дэщыгъо кампаниер Адыгеим сыдигъуи зэрифэшъуа­шэу зэрэщызэхащэрэр респуб­ликэ комиссариатым ипащэ къыIуагъ. Хабзэ зэрэхъугъэу, мы илъэсым игъэтхэ дзэ дэ­щыгъуи шапхъэхэм адиштэу зэрэрагъэкIокIыщтыр, пшъэры­л­ъэу къафагъэуцугъэхэр шIокI имыIэу зэрагъэцэкIэщтхэр къы­кIигъэтхъыгъ.

КIАРЭ Фатим.