Макъэ къытагъэIун фае

Мэлылъфэгъу мазэр къызэрехьэу паркхэм, мэзхэм, псы Iушъохэм ягъэкъэбзэн волонтерхэр ыуж ихьа­гъэх. Ащ фэдэу шIыхьаф цIыкIухэр зызэхащэхэкIэ, ахэм хэкI дзыуи 5 — 10-м къыщымыкIэу къаугъои.

— Эколог чанхэр кIэщакIо зыфэхъурэ пстэумкIи «ЭкоЦентрэр» къотэгъу афэхъуным, адеIэным фэхьазыр шъхьаем, гухэкIми, хэкIыр къызэраугъоигъэр социальнэ нэкIубгъохэр ары ныIэп зыщытлъэгъухэрэр. Региональнэ операторым дзыохэр зыдэщыс чIыпIэхэр къегъотыфэкIэ, ахэр хьэхэм зэбгыратхъых. Волонтерхэм яIофшIэн хьаулые мыхъуным пае, шIыхьафыр зэрэзэхащэщтым пэшIорыгъэшъэу тыщагъэгъуазэмэ, игъом хэкIыр Iутщыщт, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Iофтхьабзэр зэрэзэхащэщтыр, ар зыдэщыIэщт чIыпIэр колл-гупчэм е диспетчерскэ къулыкъум ятелефонхэмкIэ къаIон алъэкIыщт. Мары номерхэр: 9-800-707-05-08, 8-962-868-14-62. Джащ фэдэу «ЭкоЦентрэм» Инстаграмым щыриIэ нэкIубгъом (@ecocentr_adygeya) къыратхэми хъущт.

ЦIыфхэр рагъэблагъэх

Зэпахырэ узэу дунаир зэлъызыкIугъэм ыпкъ къикIыкIэ псэупIэхэр къыкIухьэзэ цIыфхэм аIукIэрэ купэу региональнэ операторым ыгъэпсыгъэхэм яIофшIэн къызэтырагъэуцогъагъ. Джы мары мэлылъфэгъу мазэм ар рагъэжьэжьыгъ.

Къалэу Мыекъуапэрэ поселкэу Яблоновскэмрэ апэчыжьэу псэухэрэм мы «мобильнэ купхэр» лъэшэу къашъхьапэх. Менеджерхэм хэкIыр зэрэIуащырэм ыуасэ къызэралъытэрэм, региональнэ операторым зэзэгъыныгъэр зэрэдэпшIыщтым афэгъэхьыгъэ упчIэхэм джэуапхэр къаратыжьых, лъэIу тхылъхэм, нэмыкIэу ищыкIагъэхэм ятынкIэ IэпыIэгъу афэхъух. ЦIыфэу ахэм закъыфэзыгъазэхэрэм паспортыр, ипсэупIэ ежь зэриунаер, нэбгырэ пчъагъэу мы уахътэм ащ исыр зыфэдизыр къэзыушыхьатырэ тхылъхэр ыIыгъынхэ фае.

Мыщ фэдэу «мобильнэ купхэм» псэупIэхэр къа­кIухьэхэ нахь мышIэми, пэIудзыгъэ шIыкIэм тетэуи региональнэ операторым испециалистхэм зафэбгъэзэн амалыри зэрэщыIэр шъугу къэтэгъэкIыжьы. Ащ пае интернет нэкIубгъор (https://adygeya.clean-rf.ru) е электроннэ почтэр (adg_ecocentr@clean-rf.ru) жъугъэфедэнхэ шъулъэкIыщт.

«ЭкоЦентрэм» и Адыгэ шъолъыр къутамэ ипресс-къулыкъу.