Адыгеим ыцIэкIэ сенаторэу, партиеу «Единэ Росси­ем» хэтэу Хъопсэрыкъо Мурат къуаджэу Хьатикъуае щы­Iагъ, гъэсэныгъэмрэ культурэмрэ япсэуалъэхэу лъэпкъ проектхэмрэ федеральнэ программэхэмрэ къады­хэ­лъытагъэу мыщ щагъэпсыхэрэр е щагъэцэкIэжьыхэрэр къыплъыхьагъэх.

Сенаторым Красно­гвардейскэ районым ипащэу Гъубжьэкъо Темуррэ районым инароднэ де­путатхэм я Совет итхьаматэу Анна Выставкинамрэ игъу­сэхэу Хьати­къое модельнэ тхылъ­еджапIэм щыIагъ.

Урысые Федерацием культурэмкIэ и Министерствэ 2019-рэ илъэсым зэхищэгъэгъэ зэнэкъокъум Хьатикъое тхылъеджапIэр щатекIуи, лъэпкъ проектэу «Культура» зыфиIорэм диштэу ащ игъэкIэжьын пае мылъку къатIупщыгъ. ТхылъеджапIэмрэ ащ къыпэIулъ чIыпIэмрэ ягъэцэкIэ­жьын пае чIыпIэ бюджетым сомэ миллиони 2 фэдиз къы­хигъэкIыгъ. А мылъкумкIэ унашъхьэр, шъхьаныгъу­пчъэ блыпкъхэр, унэр зэ­рагъэфэбэрэ пкъыгъохэр зэблахъугъэх, ащ ыгупэ агъэцэкIэжьыгъ, пандусыкIэ агъэпсыгъ. Ащ нэмыкIэу федеральнэ, республикэ бюджетхэм къахэкIыгъэ сомэ миллиони 5,5-мкIэ ящыкIэгъэ мебелымрэ интерактивнэ оборудованиемрэ къащэфыгъэх, интернетыр къызфагъэфедэ хъугъэ.

Ащ ифонд тхылъ мини 3,5-рэ къыхахъуи, мин 11,3-рэ чIэлъ хъугъэ. ТхылъеджапIэм фэди 3-кIэ нахьыбэу цIыфхэр къекIуалIэхэ хъугъэ.

Хъопсэрыкъо Мурат культурэ, гъэсэныгъэ Iоф­тхьабзэхэр зыщызэра­хьэ­рэ тхылъеджапIэм иIоф­шIэн осэшхо къыфи­шIыгъ, классикхэм, урыс, адыгэ тхакIохэм япроизведе­ниехэм кIэлэцIыкIухэмрэ ныбжьыкIэхэмрэ япIункIэ мэхьанэшхо зэряIэр хи­гъэунэфыкIыгъ.

«КIэлэцIыкIухэми, зыныбжь икъугъэхэми джырэ тхакIохэм япроизве­дениехэми, классическэ произведениехэми нэIуасэ зафашIынэу амал яI. КъыткIэхъухьэрэ ныбжьыкIэхэм зэдиштэу хэхъоныгъэ зэрашIыщтым, пIуныгъэ тэрэз зэрагъотыщтым ащ тицыхьэ тырытегъэ­гъэлъы. Мыщ тхылъхэм зэращыфэсакъхэрэм нэмыкIэу, джырэ технологиякIэхэри щагъэфедэх», — къыIуагъ сенаторым, Нэужым Хъопсэрыкъо Мурат Хьатикъое гурыт еджапIэу N 2-м цифрэ, гуманитар гъэсэныгъэ ягъэгъотыгъэнымкIэ Гуп­чэу щызэхэщагъэм щы-Iагъ. Шъолъыр проектэу «Джырэ гурыт еджапIэр» зыфиIорэм къыдыхэлъытагъэу 2020-рэ илъэсым Iоныгъом и 1-м мы Гупчэр къызэIуахыгъ. Бюджет пстэуми къахэкIэу ащ ишIын сомэ миллион 1,5-рэ фэдиз пэIуагъэхьагъ. Джырэ оборудованиемкIэ зэтегъэпсыхьэгъэ каби­нетхэр сенаторым зэригъэлъэгъугъэх. РобототехникэмкIэ, печатымкIэ, мо­делированиемкIэ пэублэ шIэныгъэхэр мыщ щызэрагъэгъотых, квад­рокоптерыр агъэIоры­шIэн, пэублэ медицинэ IэпыIэгъу арагъэгъотын зэралъэкIыщт шIыкIэм мыщ зыщафагъасэ.

ТехнологиемкIэ, ОБЖ­-мкIэ, информатикэмкIэ программэ шъхьаIэхэр гупчэм щарагъэкIух. Ащ нэмыкIэу кружокхэу «Информатик ныбжьыкI», «Инфознайка», «Авангард», «Конструктор ныбжьыкI», «Шахматист ныбжьыкI» зыфиIохэрэми Iоф ашIэ.

Хъопсэрыкъо Мурат зэрэхигъэунэфыкIыгъэмкIэ, мы проектым кIэлэцIыкIухэм амал къареты тапэкIэ агъэфедэщт сэнэ­хьатхэм нэIуасэ зафа­шIы­нэу, анахь ящыкIэгъэщт лъэныкъохэмкIэ шIэны­гъэхэр зэрагъэгъотынэу.

ФедерациемкIэ Со­ветым хэтыр цIыфхэм япсау­ныгъэ зыщагъэпы­тэрэ физкультурэ комплексэу Хьатикъуае дэтми щыIагъ. 2019 — 2020- рэ илъэсхэм гъэцэкIэ­жьынышхоу ащ рашIылIа­гъэхэм сомэ миллиони 2 фэдиз апэIухьагъ. Джыдэдэм мыщ кIэлэцIыкIу 60-м ехъу къекIуалIэ, ахэр самбэмрэ атлетикэ онтэгъумрэ апылъых.

Парламентарием джащ фэдэу сабыи 120-мэ ате­лъытэгъэ кIэлэцIыкIу IыгъыпIэу ашIырэр къыплъы­хьагъ. Лъэпкъ проектэу «Демография» зыфиIорэм къыдыхэлъытагъэу ар агъэпсы. Сомэ миллион 90-рэ фэдиз ащ пэIухьанэу къырадзэ.

Хъопсэрыкъо Мурат зэрэхигъэунэфыкIыгъэмкIэ, социальнэ инфраструктурэм ипсэуалъэхэр къуаджэм щыгъэ­псыгъэнхэмкIэ, цIыф­хэм ящыIэкIэ амал­хэм зыкъягъэIэты­гъэнымкIэ Адыгеим Iофышхо джыдэдэм щашIэ. А пстэур зытегъэпсыхьагъэр хэгъэгум и Президент къыгъэуцугъэ пшъэ­рылъхэр гъэцэкIэ­гъэнхэр, къэлэдэс­хэмрэ къоджэдэс­хэмрэ зэфэдэ щы­IакIэ яIэныр ары.

АР-м и ЛIышъхьэ ипресс-къулыкъу