Мэлылъфэгъум и 9-м къыщегъэжьагъэу и 11-м нэс лагерэу «Горный» зыфиIорэм Къыблэ федеральнэ шъолъырым истуденческэ отрядхэм я Фестиваль-спартакиадэ щыкIуагъ.

Шъолъыри 7-мэ къарыкIыгъэ ныбжьыкIэхэр зэнэкъокъугъэх. ИлъэскIэ узэкIэIэбэжьмэ ныбжьыкIэ проектхэм афэгъэ­хьыгъэ Урысые зэнэкъокъум Адыгеим ишъолъыр штаб ипащэу Ярослав Борсук текIоныгъэ къыщыдихыгъагъ ыкIи мы фестивалыр Адыгеим щызэхащэным фэшI грант къыфагъэшъошэгъагъ. Чъэпыогъум зэхащэнэу щытыгъ, ау пандемием ыпкъ къикIыкIэ ар лъагъэкIотагъ.

Iофтхьабзэр мэфэкI шIыкIэм тетэу къызэIуахыгъ. АР-м и ЛIышъхьэу КъумпIыл Мурат ыцIэкIэ АР-м гъэсэныгъэмрэ шIэныгъэмрэкIэ и Министерствэ кIэлэцIыкIухэмрэ ныбжьыкIэ­хэмрэ япIункIэ къэралыгъо политикэр пхырыщыгъэным игъэIорышIапIэ ипащэу Нэгъэ­рэкъо Алый къызэрэугъоигъэхэм шIуфэс къарихыгъ.

— Адыгеим шъукъызэреблэгъагъэр лъэшэу тигуапэ хъугъэ. Зэнэкъокъум шъухэлэжьэн, текIоныгъэ къызэрэщыдэшъухыщтыр арэп пшъэрылъ шъхьаIэр, нэIуасэ шъузэфэхъун, ныбджэгъуныгъэ шъуазыфагу къихьан, опытэу шъхьадж IэкIэлъымкIэ шъузэхъожьыныр ары нахь. Шъолъыр отделением ипащэхэу, зэшъхьэгъусэхэу Ярославрэ Ольгэрэ тафэраз Iофтхьабзэр республикэм щызэхэтщэн амал къызэрэтатыгъэмкIэ. Зэрифэшъуашэу зыкъэжъугъэлъэгъонэу, хэхъоныгъэхэр шъушIынхэу сышъуфэлъаIо, — къыIуагъ Нэгъэрэкъо Алый.

— ШъукъызэрэкIуагъэр лъэшэу тигуапэ, мы Iофтхьабзэр республикэм щызэхэтщэнэу зэрэхъугъэм тырэгушхо. Спортым, творчествэм, тарихъым алъэныкъокIэ Iофтхьэбзэ гъэшIэгъонхэр къышъуфэдгъэхьазырыгъэх, — къыхигъэщыгъ Ярослав Борсук.

НыбжьыкIэ анахь чанхэр къызэрэзэрэугъоигъэхэр къы­Iуагъ Къалмыкъ РеспубликэмкIэ отделением икомиссарэу Владимир Каршаевым. Зэрэщыгугъыгъэхэу ом изытет къычIэмыкIыгъэми, ар пэрыохъу къа­фэмыхъоу зэрэзэнэкъокъущтыхэр къыхигъэщыгъ.

Купэу «Мыекъуапэ инэфылъэ­хэр» зыфиIорэм адыгэ къашъоу къышIыгъэр хьакIэхэм лъэшэу агу рихьыгъ.

Нэужым спортым ылъэныкъо­кIэ ныбжьыкIэхэм зыкъагъэлъэ­гъуагъ. Пчыхьэм интеллектуальнэ джэгукIэу «Что? Где? Когда?» зыфиIорэмкIэ зэнэкъокъу­гъэх. Джащ фэдэу Адыгэ эпосым фэгъэхьыгъэ тематическэ квест зэхащагъ. ЯтIонэрэ мафэм творчествэм ылъэныкъокIэ командэхэр зэнэкъокъугъэх.

Къыблэ федеральнэ шъолъы­рымкIэ студенческэ отрядхэм я Фестиваль-спартакиадэу Адыгеим щызэхащагъэр гъэшIэгъо­нэу кIуагъэ. Адыгэ Республикэм, Краснодар краим, Къалмыкъым, Волгоград ыкIи Ростов хэку­хэм, Къырым ыкIи Севастополь къа­рыкIыгъэ ныбжьыкIэхэр зэнэкъо­къугъэх.

Ростов хэкум къикIыгъэ командэм ипащэу Диана Косыгинам къызэрэтиIуагъэмкIэ, Адыгеим апэрэу къэкIуагъэх. Лъэныкъо зэфэшъхьафхэмкIэ ныбжьыкIэхэм зыкъагъэлъэгъоным фэхьазырых. ТхьамэфитIум къыкIоцI игъэкIотыгъэу за­гъэ­хьазырыгъ. Нэбгырэ 15 мэхъух. — Нэбгырэ 12 тэхъу, Адыгеим апэрэу тыкъэкIуагъ, нэгушIоу къыщытпэгъокIыгъэх. НыбжьыкIэхэм нэIуасэ тафэхъу­ныр, текIоныгъэм тыфэбэнэныр ары типшъэрылъыр. Мыщ тыкъэ­кIоным ыпэкIэ шъолъыр спартакиадэм тыхэлэжьагъ ыкIи ащ текIоныгъэ къыщыдэзыхыгъэ­хэр ары Адыгеим къэкIуагъэхэр, — еIо Севастополь къикIыгъэ Дмитрий Антоненкэм.

— Къалэу Элиста тыкъи­кIыгъ, нэбгырэ 15 тэхъу. Пчэдыжьым жьэу тыкъэсыгъ, нэгушIоу къыт­пэгъокIыгъэх. Зыдгъэпсэфынэу уахътэ къытатыгъ, джы лъэныкъо зэфэшъхьафхэмкIэ зыкъэдгъэлъэгъоным тыфэхьазыр, спорт зэнэкъокъухэм анэмыкIэу творчествэм ылъэныкъокIи зыкъэдгъэхьазырыгъ. Джащ фэдэу тишъолъыр фэгъэхьыгъэ къэгъэ­лъэгъон къэдгъэхьазырыгъ, — еIо Къалмыкъ Республикэм къикIыгъэ Виктория Суховам.

Мэфищым шъолъырхэм къарыкIыгъэ командэхэм зыкъагъэ­лъэгъуагъ. СпортымкIэ гъэхъэгъэ ин зиIэ зи мыхэм ахэты­гъэп. НыбжьыкIэхэм япсауныгъэ апсыхьаныр, спортыр шIу ягъэ­лъэгъугъэныр пшъэрылъ шъхьа­Iэхэм ащыщыгъ. Мыекъопэ къэралыгъо технологическэ университетыр, Мыекъопэ къэлэ администрацием спортымкIэ ыкIи культурэмкIэ я Комитетхэр IэпыIэгъу къазэрафэхъугъэмкIэ АР-м ишъолъыр штаб лъэшэу афэраз.

Мэлылъфэгъум и 11-м зэфэ­хьысыжьхэр ашIыгъэх. Къырым къикIыгъэ командэм апэрэ чIыпIэр къыдихыгъ. В.И. Вернадскэм ыцIэ зыхьырэ федеральнэ университетэу Къырым дэтым ифакультет зэфэшъхьаф­хэм ястудентхэр ары респуб­ликэм къэкIуагъэхэр.

— Тызышъхьамысыжьэу, зэрифэшъуашэу зыкъэдгъэлъэгъон гухэлъ тиIэу фестивалым тыкъэкIуагъ. Командэхэм зэкIэми дэгъоу зыкъагъэлъэгъуагъ, ом изытет емылъытыгъэу тызэнэкъокъугъ. ТикомандэкIэ зэгурыIоныгъэ тазыфагу илъэу, дэгъоу зызэрэфэдгъэхьазырыгъэм ишIуагъэкIэ командэхэмкIэ апэрэ чIыпIэр къыдэтхыгъ. Ащ тырыгушхоу, тырыразэу тадэжь тэкIожьы, — еIо Къырым къи­кIыгъэ командэм ипащэу Аб­дула­зиз Буриевым.

Къыблэ федеральнэ шъолъы­рым истуденческэ отрядхэм я Фестиваль-спартакиадэу Адыгеим щыкIуагъэр ныбжьыкIэхэм бэрэ агу дахэкIэ къэкIыжьыщт.

ДЕЛЭКЪО Анет.