Урысыбзэр зэрашIэрэр къагъэлъэгъуагъ
IэкIыб къэралыгъохэм къарыкIыгъэ студентхэу Адыгэ къэралыгъо университетым щеджэхэрэм урысыбзэмкIэ мы мафэхэм диктант атхыгъ. Апшъэрэ еджапIэм итхылъеджапIэ ар щыкIуагъ.Адыгэ къэралыгъо университетым истуденти 180-рэ Iофтхьабзэм хэлэжьагъ. Ащ зэфэхьысыжьэу фэхъугъэхэм комиссием хэтхэр ыгъэрэзагъэх. Хэукъоныгъэ зымышIыгъэхэм сертификатхэр афагъэшъошагъэх.
Ахэр: филологическэ факультетым истудентэу Евгений Харченкэр, IэкIыб къэралыгъуабзэхэмкIэ факультетым истуденткэу Махри Шариповар ыкIи дунэе факультетым истуденткэу Лачын Гурбанмырадовар.
Диктантэу атхыгъэм къыгъэлъэгъуагъ Адыгэ къэралыгъо университетым щеджэхэрэм урысыбзэр шIу зэралъэгъурэр ыкIи дэгъоу зэрэзэрагъашIэрэр.
ДЕЛЭКЪО Анет.