Гуащэр, нысэр къыодэIуа?
Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм мэлылъфэгъум и 14-м адыгабзэкIэ къэгъэлъэгъоныр щыкIощт.
— Урысыем культурэмкIэ изаслуженнэ IофышIэу Цэй Ерстэм ытхыгъэм техыгъэу «Угощэ дэгъумэ, урихьылIагъ» зыфиIорэ спектаклэр ятIонэрэу дгъэуцужьыгъ, — къытиIуагъ къэгъэлъэгъоным ирежиссерэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Спектаклэр адыгабзэкIэ къэдгъэлъэгъоным фэшI зэхэщэн IофхэмкIэ республикэ общественнэ движениеу «Адыгэ Хасэр» IэпыIэгъу къытфэхъугъ. Ащ фэшI Адыгэ Хасэм итхьаматэу ЛIымыщэкъо Рэмэзан, Хэсашъхьэм хэтхэм тафэраз, «тхьашъуегъэпсэу» ятIожьы тшIоигъу.
Къэгъэлъэгъоныр адыгэ унагъом ищыIакIэ ехьылIагъ. Нысэр зэсэгъэ шэн-зекIуакIэхэр унэгъуакIэу зэрыхьагъэм щигъэфедэнхэу регъажьэ, гуащэм гурыIорэп. Сабый къыфэхъугъэу унагъом екIыжьы. Нысэм унагъом къызэригъэзэжьыгъэ шIыкIэр,
гуащэм, нэмыкIхэм язекIуакIэхэр дэгъоу къагъэлъагъо артистхэу Бэгъ Алкъэс, ЛIый Бэлэ, Кобл Зурыет, ШъхьакIэ Арсен, Мышъэ Аскэр. — Адыгабзэр, лъэпкъ шэн-хабзэхэр зэгъэшIэгъэнхэмкIэ спектаклэхэр нахьыбэрэ къалэхэм, къуаджэхэм къащыгъэлъэгъонхэ фае, — къытиIуагъ Адыгэ Хасэм и Хэсашъхьэ хэтэу Нэхэе Аслъан. — Режиссерым, артистхэм таIукIагъ, нэмыкI къэгъэлъэгъонхэр зэхащэнхэ ямурад.
Оркестрэм идирижерэу Аркадий Хуснияровым, артистхэу ЛIый Бэлэ, Бэгъ Алкъэс, фэшъхьафхэм спектаклэр ашIогъэшIэгъон, театрэр зыгу рихьыхэрэм зэраIукIэщтхэм дэгуIэх.