Быслъымэн диныр зылэжьыхэрэм мэзэ лъапIэу Рэмэзаныр шIэхэу къафихьащт.

Мы илъэсым имэлылъфэгъу мазэ нэкIыр заубытыщтыр джыри гъэнэфагъэу ашIэрэп. МэзакIэр къызщихьэрэм елъытыгъэу ар къалъытэщт. Пчыхьэм мэзакIэр къихьагъэмэ, пчэдыжьым нэкIыр пIыгъэу утехьэ. Джащ фэд, къыкIэлъыкIорэ мазэр къихьэмэ, хэIэжьых.

Адыгэ Республикэм ыкIи Пшызэ шъолъыр ащыпсэухэрэ быслъымэнхэм я ДиндэлэжьапIэ имуфтий игуадзэу Шъхьэлэхъо Ибрахьим къызэриIуагъэм­кIэ, а мазэр ары КъурIан лъапIэр къызехыгъэр, быслъымэнхэми нэкIыр зыщырагъажьэрэр. НэкIыр Ислъам диным ипкъэуитфымэ зэу ащыщ. Тхьэм цIыф пстэуми нэкIыр къатырилъхьагъ. Тхьэм къыригъэхыгъэ КъурIаным унэкIын зэрэфаер къыгъэнафэу Iаятхэр итых. Алахьталэм мырэущтэу КъурIанымкIэ зыкъытфегъазэ: «О, шIошъхъуныгъэ зиIэхэр! ШъуапэкIэ цIыфхэм зэрателъы­гъэм фэдэу нэкIыр шъори шъутелъ…»

НэкIмазэм псапэу къыкIакIорэр гъэ­нэфагъэп, Тхьэр зыфаем фэдиз. ЦIыфым шIоу ышIэрэм тефэрэ псапэр Алахьталэм къыретыжьы, ау НэкIмазэм тефэрэр зыми ымылъэгъоу къыIуегъэкIэжьы. Мы мэзэ лъапIэм гунахьри, псапэри лъэшэу мэбагъох. Гулъытэ уиIэныр, шъыпкъагъэ пхэлъыныр, мыхъун умышIэныр — мыхэр анахь шъхьаIэх.

— НэкIмазэр зынэкIынэу къызыте­фэрэр быслъымэнэу зиакъыл зэтетыр, мысымаджэр, зыныбжь икъугъэр ары. НэкIмазэр ыгукIи, ышъхьэкIи хэти ыштагъэу, ар фарзэу Алахьэм къызэратырилъ­хьагъэр ышIэу щытын фае. ЫмышIэрэмэ, ебгъэшIэнэу щыт. ЦIыф сымаджэм, джащ фэдэу бзылъфыгъэм имэзэ сымэджэгъу ыкIи сабый ежэмэ е быдзыщэкIэ егъаш­хэмэ, анэкIыныр къатефэрэп. Гъогу тет цIыфми нэкIыр Алахьталэм фегъэгъу. Ахэм сыда ашIэн фаер? НэкIмэзэ мафэ къэс зы нэбгырэ агъашхэмэ е ащ те­фэщт ахъщэр тхьамыкIэ горэм ратымэ, гунахьыр Тхьэм ашъхьащехы, — къы­Iуагъ муфтиим игуадзэ.

ЫпшъэкIэ къызэрэтIуагъэу, къи­хьащт тхьамафэм нэкIыр зыщырагъэжьэщтыр джыри теубытагъэу ашIэрэп. Арышъ, къэбархэм шъуалъыплъ. НэкIмазэм епхыгъэ шапхъэхэм, ахэр быслъымэн­хэм зэрагъэцэкIэн фаем ехьылIэгъэ къэбархэр, таблицэр тигъэзет инэкIубгъохэм къарыхьащтых.

КIАРЭ Фатим.